പടക്കം പൊട്ടിക്കൽ; സുപ്രീംകോടതി വിധി നടപ്പാക്കാൻ നിർദേശം

തിരുവനന്തപുരം: ദീപാവലിയോടനുബന്ധിച്ച് പടക്കം പൊട്ടിക്കുന്നതുമായി ബന്ധപ്പെട്ട സുപ്രീംകോടതി വിധിയിലെ നിർദേശങ്ങൾ നടപ്പാക്കുന്നത് സംബന്ധിച്ച് സംസ്​ഥാന പൊലീസ്​ മേധാവി ലോക്നാഥ് ബെഹ്​റ ഉത്തരവ് പുറപ്പെടുവിച്ചു. നിർദേശങ്ങൾ സ്​റ്റേഷൻ ഹൗസ്​ ഓഫിസർമാരുടെ ശ്രദ്ധയിൽപെടുത്താൻ എല്ലാ ജില്ല പൊലീസ്​ മേധാവിമാരോടും ആവശ്യപ്പെട്ടിട്ടുണ്ട്.

നിശ്ചിതസ്​ഥലത്തും സമയത്തും മാത്രമേ പടക്കങ്ങൾ പൊട്ടിക്കാവൂ എന്ന് കോടതി നിർദേശിച്ചിട്ടുണ്ട്. നിരോധിക്കപ്പെട്ട പടക്കങ്ങളുടെ വിൽപന അനുവദിച്ചുകൂട. നിർദേശങ്ങൾ ലംഘിക്കപ്പെടുന്നപക്ഷം അതതു സ്​ഥലത്തെ സ്​റ്റേഷൻ ഹൗസ്​ ഓഫിസർമാർ കോടതിയലക്ഷ്യ നടപടിക്ക്​ വിധേയരാകേണ്ടിവരും.

ദീപാവലി ദിവസത്തിലോ മറ്റ് ആഘോഷ ദിവസങ്ങളിലോ പടക്കങ്ങൾ പൊട്ടിക്കുന്നത് രാത്രി എട്ട്​ മുതൽ പത്ത്​ വരെയാക്കി കോടതി നിജപ്പെടുത്തിയിട്ടുണ്ട്. ക്രിസ്​മസ്​, ന്യൂ ഇയർ ആഘോഷങ്ങളോടനുബന്ധിച്ച് രാത്രി 11.55 മുതൽ 12.30 വരെ മാത്രമാണ് പടക്കംപൊട്ടിക്കുന്നതിന് അനുമതി നൽകിയിട്ടുള്ളത്.