അഞ്ച്​ പാർട്ടികളിൽ ഭിക്ഷാംദേഹിയെപ്പോലെ അലഞ്ഞു നടന്ന ഗവർണറുടെ ഉപദേശം ​വേണ്ടെന്ന്​ സതീശൻ

തിരുവനന്തപുരം: സംഘ്പരിവാറിന്‍റെ തിരുവനന്തപുരത്തെ വക്​താവാണ്​ ഗവർണർ ആരിഫ്​ മുഹമ്മദ്​ ഖാനെന്ന്​ പ്രതിപക്ഷ നേതാവ്​ വി.ഡി സതീശൻ. സർക്കാറുമായി വിലപേശിയ ആരിഫ്​ മുഹമ്മദ്​ ഖാന്‍റെ നടപടി പദവിക്ക്​ നിരക്കാത്തതാണ്​. ഗവർണറായിരിക്കാൻ ആരിഫ്​ മുഹമ്മദ്​ ഖാൻ യോഗ്യനല്ല. സർക്കാറും ഗവർണറും തമ്മിൽ അഡ്ജസ്റ്റ്​മെന്‍റ്​ രാഷ്ട്രീയമാണ്​ നടത്തുന്നതെന്നും അദ്ദേഹം പറഞ്ഞു.

അഞ്ച്​ രാഷ്ട്രീയപാർട്ടികളിൽ അലഞ്ഞു നടന്ന ആരിഫ്​ മുഹമ്മദ്​ ഖാന്‍റെ ഉപദേശം തനിക്ക്​ ആവശ്യമില്ല. ജീവശ്വാസം നിലക്കുന്നത്​ വരേയും താൻ കോൺഗ്രസായി തുടരും. മുതിർന്ന നേതാക്കളോട്​ താൻ അഭിപ്രായം തേടാറുണ്ടെന്നും അദ്ദേഹം പറഞ്ഞു. നയപ്രഖ്യാപന പ്രസംഗത്തിൽ ഗവർണറുടെ ഭരണഘടന ബാധ്യത ചൂണ്ടിക്കാട്ടാൻ സർക്കാറിന്​ ആയില്ലെന്നും അദ്ദേഹം കുറ്റപ്പെടുത്തി.

സംസ്ഥാന സർക്കാറിനേയും പ്രതിപക്ഷത്തേയും ഗവർണർ വിമർശിക്കുകയാണ്​. ബി.ജെ.പി ചെയ്യേണ്ട കാര്യമാണ്​ ഗവർണർ ചെയ്യുന്നത്​. ലോകയുക്​ത ഓർഡിനൻസിൽ ഒപ്പിട്ടപ്പോൾ അത്​ ഭരണഘടന ബാധ്യതയാണെന്ന്​ ​ പറഞ്ഞ ഗവർണർ പക്ഷേ നയപ്രഖ്യാപന പ്രസംഗം വന്നപ്പോൾ നിലപാട്​ മാറ്റിയെന്നും സതീശൻ കുറ്റപ്പെടുത്തി.

ഒരു പ്രതിപക്ഷ നേതാവ് എങ്ങനെ പെരുമാറണം എന്ന കാര്യത്തിൽ വി.ഡി സതീശന് ഒരു ധാരണയുമില്ലെന്നാണ് ഗവർണർ വിമർശിച്ചത്. പ്രതിപക്ഷ നേതാവ് എങ്ങനെ പെരുമാറണം എന്നത് ഉമ്മൻചാണ്ടിയെയും രമേശ് ചെന്നിത്തലയെയും കണ്ട് പഠിക്കട്ടെയെന്നും ആരിഫ് മുഹമ്മദ് ഖാൻ പരിഹസിച്ചിരുന്നു.