സതീശൻ പ്രതിപക്ഷ നേതാവായേക്കു​ം​, സുധാകരൻ കെ.പി.സി.സി പ്രസിഡന്‍റും പി.ടി തോമസ്​ യു.ഡി.എഫ്​ കൺവീനറും; അഴിച്ചുപണിയെന്ന്​​ സൂചന

തിരുവനന്തപുരം: നിയമസഭ തെരഞ്ഞെടുപ്പിൽ കനത്ത തിരിച്ചടി നേരിട്ടതിന്​ പിന്നാലെ സംസ്ഥാന നേതൃതലത്തിൽ അഴിച്ചു പണിക്ക്​ കോൺഗ്രസ് ഹൈക്കമാന്‍റൊരുങ്ങുന്നെന്ന്​ സൂചന. പ്രതിപക്ഷ നേതാവ്​, കെ.പി.സി.സി പ്രസിഡന്‍റ്​​, യു.ഡി.എഫ്​ കൺവീനർ എന്നീ പദവികളിലെല്ലാം മാറ്റം വേണമെന്നാണ്​ ​സംസ്ഥാനത്തെ ഭൂരിപക്ഷം നേതാക്കളും എം.പി​, എം.എൽ.എമാരും ഹൈക്കമാന്‍റിനെ അറിയിച്ചിരിക്കുന്നത്​.

രണ്ടാം പിണറായി സർക്കാർ അധികാരത്തിലേറുന്ന ഇന്ന്​ തന്നെ പ്രഖ്യാപനം നടത്താനാണ്​ ഹൈകമാന്‍റ്​​ ആലോചിക്കുന്നത്​.

വി.ഡി. സതീശൻ എം.എൽ.എയെ പ്രതിപക്ഷ സ്ഥാനത്തേക്ക്​ പരിഗണിക്കുന്നതായാണ്​ വിവരം. എന്നാൽ രമേശ്​ ചെന്നിത്തലയെ തന്നെ നിലനിർത്തണമെന്നും ആവശ്യമുയർന്നിട്ടുണ്ട്​. അന്തിമ തീരുമാനം ആയിട്ടില്ലെന്നാണ്​ ലഭിക്കുന്ന വിവരം.

നിലവി​ലത്തെ കെ.പി.സി.സി പ്രസിഡന്‍റ്​ മുല്ലപ്പള്ളി രാമചന്ദ്രനെ മാറ്റി കെ. സുധാകരൻ എം.പിയെ ആ സ്ഥാ​നത്തേക്ക്​ പരിഗണിക്കുന്നതായാണ്​ സൂചന.

പി.ടി. തോമസ് എം.എൽ.എയെയാണ്​​ യു.ഡി.എഫ്​ കൺവീനർ പദവിയിലേക്ക്​ പരിഗണിക്കുന്നതെന്നും സൂചനയുണ്ട്​. ഇത്​ സംബന്ധിച്ച റിപ്പോർട്ട്​ കേന്ദ്ര നിരീക്ഷകർ ഹൈകമാന്‍റിന്​ കൈമാറി.

കഴിഞ്ഞ ദിവസം പാർട്ടി എം.എൽ.എമാരുമായി ഹൈകമാന്‍റ്​ പ്രതിനിധികളായ മല്ലികാർജുൻ ഖർഗെ, വി. വൈത്തിലിംഗം എന്നിവർ കൂടിക്കാഴ്ച നടത്തിയിരുന്നു. അവരുടെ റിപ്പോർട്ട് കൂടി പരിഗണിച്ചാണ്​ ഹൈകമാന്‍റിന്‍റെ അന്തിമ തീരുമാനമുണ്ടാകുക.