കത്തിയെടുത്ത്​​ കുത്തി, തലക്കടിച്ച്​ വീഴ്​ത്തി; സനൂപിനെ​ കൊലപ്പെടുത്തിയത്​ കൂട്ടായ ആക്രമണത്തിലൂടെ

തൃശൂർ: സി.പി.എം പുതുശേരി ബ്രാഞ്ച് സെക്രട്ടറി സനൂപിനെ ചിറ്റിലങ്ങാട്ടുവെച്ച്​​ കൊലപ്പെടുത്തിയത്​ കൂട്ടായ ആക്രമണത്തിലൂടെയെന്ന്​​ പ്രതികൾ മൊഴി നൽകി. കേസിലെ പ്രതികളായ​ സുജയ്​ കുമാറിനെയും സുനീഷിനെയും ബുധനാഴ്​ച രാത്രി പൊലീസ്​ അറസ്​റ്റ്​ ചെയ്​തിരുന്നു​. ഇവരെ ചോദ്യം ചെയ്​തതിൽനിന്നാണ് കൂടുതൽ​ വിവരങ്ങൾ ലഭിച്ചത്​.

സുനീഷ്​ വെട്ടുകത്തി ഉപയോഗിച്ച്​ സനൂപിനെ കുത്തി. തുടർന്ന്​ സുജയ്​ കുമാർ തലക്കടിച്ച്​ വീഴ്​ത്തുകയായിരുന്നു. ഇവർ ഉപയോഗിച്ച ആയുധം ബുധനാഴ്​ച രാത്രി തന്നെ പൊലീസ്​ കണ്ടെത്തി. പ്രതികളെ വ്യാഴാഴ്​ച സംഭവസ്​ഥലത്ത്​ എത്തിച്ച്​ തെളിവെടുപ്പ്​ നടത്തും. കൂടാതെ ഇവരെ കോടതിയിൽ ഹാജരാക്കുകയും ചെയ്യും.

മൂന്നുപേരാണ്​ ഇതുവരെ അറസ്​റ്റിലായത്​. ഒന്നാ​ംപ്രതി നന്ദൻ (48) നേരത്തെ അറസ്​റ്റിലായിരുന്നു. നന്ദനെ 14 ദിവസത്തേക്ക്​ കോടതി റിമാൻഡ്​ ചെയ്​തു. പ്രതികളായ മാരോൺ, അഭയരാജ്​, കണ്ടാലറിയുന്ന ഏതാനും പേർ എന്നിവരാണ്​ ഇനി​ പിടിയിലാകാനുള്ളത്​.

എ.സി.പി ടി.എസ്. സിനോജി​െൻറ നേതൃത്വത്തിലെ സംഘമാണ്​ നന്ദനെ പിടികൂടിയത്​. പൊലീസി​െൻറ നേതൃത്വത്തിൽ വ്യത്യസ്ത സംഘങ്ങളായി പരിശോധന നടത്തുന്നതിനിടയിൽ തൃശൂരിൽ നിന്നാണ്​ നന്ദനെ പിടികൂടിയത്​. ഒളിവിൽ കഴിഞ്ഞ കേന്ദ്രത്തിൽ നിന്നാണ് ഇയാൾ അറസ്​റ്റിലായത്​.

കഴിഞ്ഞ ഞായറാഴ്ച അർധരാത്രിയോടെയാണ്​ സനൂപി​നെ കൊലപ്പെടുത്തിയത്​. ചിറ്റലങ്ങാട് മേഖലയിൽ ഇരു വിഭാഗങ്ങൾ തമ്മിലുണ്ടായ തർക്കവും അതോടനുബന്ധിച്ചുണ്ടായ സംഘട്ടനവും സംസാരിച്ച് പരിഹരിക്കാൻ കൂട്ടുകാരോടൊപ്പം പോയതായിരുന്നു. വീണ്ടും ഇതേ തുടർന്നുണ്ടായ തർക്കം കത്തികുത്തിലും കൊലപാതകത്തിലും കലാശിക്കുകയായിരുന്നു.

മുഖ്യപ്രതിയായ നന്ദനൻ കഴിഞ്ഞ ആഗസ്​റ്റ്​ 15 നാണ് വിദേശത്ത് നിന്ന് നാട്ടിലെത്തിയത്. പിന്നീട് ക്വാറൻറീനിൽ കഴിഞ്ഞ ശേഷം രണ്ടാഴ്ച മുമ്പാണ് പുറത്തിറങ്ങിയത്. വിദേശത്തുനിന്ന് കൊണ്ടുവന്ന കത്തിയാണ് സനൂപിനെ കുത്താൻ ഉപയോഗിച്ചിട്ടുള്ളതെന്ന് പൊലീസ് വ്യക്തമാക്കിയിരുന്നു.