സംഘ്​പരിവാർ നേതാക്കൾ സുകുമാരൻ നായരുമായി കൂടിക്കാഴ്ച നടത്തി

ചങ്ങനാശ്ശേരി: സ്പീക്കര്‍ എ.എന്‍. ഷംസീറിന്‍റെ മിത്ത്​ പ്രസ്താവനയെച്ചൊല്ലിയുള്ള വിവാദം നിലനിൽക്കെ, ആർ.എസ്​.എസ്​ ഉൾപ്പെടെ സംഘ്​പരിവാർ നേതാക്കൾ പെരുന്നയിലെ എൻ.എസ്​.എസ് ആസ്ഥാനത്തെത്തി ജനറൽ സെക്രട്ടറി ജി. സുകുമാരൻ നായരുമായി കൂടിക്കാഴ്ച നടത്തി.

മുതിര്‍ന്ന ആര്‍.എസ്.എസ്​ പ്രചാരകന്‍ എസ്. സേതുമാധവന്‍, വി.എച്ച്.പി സംസ്ഥാന അധ്യക്ഷന്‍ വിജി തമ്പി, അയ്യപ്പ സേവാസമാജം നേതാവ് എസ്.ജെ.ആര്‍ കുമാർ എന്നിവരാണ്​ ചർച്ച നടത്തിയത്​. വ്യാഴാഴ്ച ഉച്ചക്ക്​ ഒരു മണിയോടെ എത്തിയ ഇവർ ഒരു മണിക്കൂറോളം എൻ.എസ്​.എസ്​ ആസ്ഥാനത്ത്​ ചെലവഴിച്ചു. പുറത്തിറങ്ങിയ നേതാക്കൾ കൂടിക്കാഴ്ചയെക്കുറിച്ച്​ പ്രതികരിച്ചില്ല.

വിശ്വാസത്തെ ഹനിക്കുന്ന പ്രസ്താവന നടത്തിയ സ്പീക്കർ അത്​ പിൻവലിച്ച്​ മാപ്പ്​ പറയണമെന്നും വിശ്വാസ സംരക്ഷണത്തിന്​ ഹിന്ദുസംഘടനകൾക്കൊപ്പം നിലകൊള്ളുമെന്നും സുകുമാരൻ നായർ കഴിഞ്ഞദിവസം പ്രഖ്യാപിച്ചിരുന്നു.