ശമ്പള കമീഷൻ റിപ്പോർട്ട്​: മാതാപിതാക്കളെയും കൊച്ചുകുട്ടികളെയും പരിചരിക്കാൻ ഒരു വർഷം അവധി

തിരുവനന്തപുരം: മാതാപിതാക്കളെയും കൊച്ചുകുട്ടികളെയും പരിചരിക്കാൻ അനുവദിക്കുന്ന അവധി ശമ്പള കമീഷൻ റിപ്പോർട്ടിലെ പുതുമയുള്ള നിർദേശം. കിടപ്പുരോഗികളായ മാതാപിതാക്കളെ പരിചരിക്കാൻ 40 ശതമാനം ശമ്പളത്തോടെ ഒരുവർഷമാണ്​ (365 ദിവസം) അവധി അനുവദിക്കുക. രണ്ടുതവണയിൽ അധികരിക്കാതെ ഇൗ അവധിയെടുക്കാം. സർക്കാർ മെഡിക്കൽ ഒാഫിസറുടെ ചികിത്സ സംബന്ധിച്ച സർട്ടിഫിക്കറ്റ്​ നിർബന്ധമാണ്​.

മൂന്നുവയസ്സ്​​ വരെയുള്ള കുട്ടികളുള്ള വനിതാ ജീവനക്കാർക്ക്​ ഒരുവർഷ അവധിയായ ചെൽഡ്​ കെയർ ലീവ്​ രണ്ടുതവണയിൽ അധികരിക്കാതെയെടുക്കാം. 40 ശതമാനം ശമ്പളം ലഭിക്കും. പ്രൊബേഷൻകാർക്ക്​ ഇത്​ അനുവദിക്കില്ല. പിതൃത്വ അവധി അഞ്ച്​ ദിവസം വർധിപ്പിച്ചു​.

*കരിയർ അഡ്വാൻസ്​ സ്​കീം പ്രകാരം ഡോക്​ടർമാർക്കും വെറ്ററിനറി സർജൻമാർക്കും ഉയർന്ന സ്​കെയിൽ ലഭിക്കും. ആരോഗ്യവകുപ്പിൽ അസി. സർജൻ, മെഡിക്കൽ ഒാഫിസർ തുടങ്ങിയവയിൽ എട്ടുവർഷ സർവിസിൽ 95,600-1,53,200 എന്ന സ്​കെയിലിലും 15 വർഷമായവർക്ക്​​ 1,18,100-1,63,400 സ്​കെയിലിലും ശമ്പളം ലഭിക്കും. ഡെൻറൽ വിഭാഗം, ഇൻഷുറൻസ്​ എന്നിവയിലും സമാനമായിരിക്കും.

അഗ്രികൾച്ചർ വകുപ്പിൽ അസി. എൻജിനീയർ, വെറ്ററിനറി സർജൻ, ചില വകുപ്പിലെ അസി. എൻജിനീയർമാർ, ഹോമിയോപതി, ആയുർവേദ മെഡിക്കൽ ഒാഫിസർമാർ തുടങ്ങിയ തസ്​തികകൾക്കും ഇൗ പരിഗണന ലഭിക്കും.