സാലറി ചലഞ്ച്: വിസമ്മതിച്ചവരുടെ പട്ടിക പുറത്ത്​; പൊലീസിൽ പ്രതിഷേധം

കൊച്ചി: മുഖ്യമന്ത്രിയുടെ സാലറി ചലഞ്ചിൽ പങ്കെടുക്കാത്ത പൊലീസുകാരുടെ പേര്​ വിവരം പുറത്ത് വിട്ടു. സിറ്റി പരിധിയിലുള്ള 2300 പൊലീസുകാരിൽ ഒരു മാസ ശമ്പളം നൽകാൻ കഴിയില്ലെന്ന് അറിയിച്ച 573 പേരുടെ വിവരങ്ങളാണ് സിറ്റി പൊലീസ്​ കമീഷണറുടെ ഒാഫിസ്​ പുറത്തുവിട്ടത്. വിവരങ്ങൾ പരസ്യപ്പെടുത്തിയതിനെതിരെ പൊലീസുകാർക്കിടയിൽ പ്രതിഷേധം ശക്​തമായി.

നിര്‍ബന്ധപൂര്‍വം ശമ്പളം ആവശ്യപ്പെടാന്‍ പാടില്ല എന്ന നിര്‍ദേശം നിലനില്‍ക്കെ പട്ടിക പ്രസിദ്ധീകരിച്ചതിന്​ പിന്നില്‍ വ്യക്തമായ ലക്ഷ്യങ്ങളുണ്ടെന്നാണ് ഒരു വിഭാഗം പറയുന്നത്.
അതേസമയം വിസമ്മത പത്രം കൊടുത്തവരുടെ ശമ്പളം റദ്ദാകാതിരിക്കാനുള്ള മുൻകരുതൽ നടപടിയാണിതെന്ന് അധികൃതർ വിശദീകരിച്ചു. പട്ടിക അതത് സ്​റ്റേഷനിലേക്ക് അയച്ച് ആരെങ്കിലും വിട്ടുപോയിട്ടുണ്ടോ എന്ന് ഉറപ്പുവരുത്താനാണ് ഈ നടപടിയെന്ന് അവർ അറിയിച്ചു. ഞായറാഴ്ച ഉച്ചക്ക് മുമ്പ്​ വിട്ടുപോയവരുടെ പേര് ചേർക്കാൻ അവസരം നൽകി കൂടിയാണ്​ പട്ടിക അയച്ചത്. തിങ്കാളാഴ്ച ശമ്പള ബില്‍ കൊടുക്കണമെന്നിരിക്കെ ഇത്തരം തെറ്റ്​ ആവര്‍ത്തിക്കാതിരിക്കാനാണ് പട്ടിക പ്രസിദ്ധീകരിച്ചത്.

ഓഖി സമയത്ത് ശമ്പള വിഹിതം നല്‍കാന്‍ സമ്മതം അറിയിക്കാതിരുന്ന 33 പേരുടെ വേതനം ക്ലറിക്കൽ പിഴവുകൊണ്ട് റദ്ദായിരുന്നു. ഈ സാഹചര്യം ഒഴിവാക്കാനാണ് നടപടി. ഒടുവിൽ ബില്‍ സെക്​ഷനില്‍ ഇരുന്ന നാല് ഉദ്യോഗസ്ഥരുടെ കൈയില്‍നിന്ന് തുക പിടിക്കുകയാണുണ്ടായതെന്നും അവർ പറഞ്ഞു.