ശബരിമല സ്ത്രീ പ്രവേശനം: സമരം ശക്​തമാക്കുന്നു

കോട്ടയം: സുപ്രീംകോടതി വിധിയെത്തുടർന്ന്​ ശബരിമല സ്ത്രീ പ്രവേശന വിഷയത്തിൽ സംസ്​ഥാന സർക്കാർ നിലപാട്​ കടുപ്പിച്ചതോട വിവിധ ഹൈന്ദവ സംഘടനകൾ പ്രതിഷേധ സമരം ശക്തമാക്കുന്നു. സുപ്രീംകോടതി വിധി പുനഃപരിശോധിക്കാന്‍ കേന്ദ്ര-സംസ്ഥാന സർക്കാറുകള്‍ മുന്‍കൈയെടുക്കണമെന്നാവശ്യപ്പെട്ട് നടത്തുന്ന സമരത്തിൽ ബി.ജെ.പി നേതാക്കളും പ്രവർത്തകരും സജീവമാണ്​.​ തുടക്കത്തിൽ വിധിയെ പിന്തുണച്ച കോൺഗ്രസും ഇപ്പോൾ സർക്കാറിനെതിരെ രംഗത്തുണ്ട്. പുനഃപരിശോധന ഹരജി നൽകണമെന്നാണ്​ അവരുടെയും ആവശ്യം. ഫലത്തിൽ സമരം സർക്കാറിനെതിരെയാകുകയാണ്​. എന്നാൽ, സമരത്തി​​​െൻറ ഗതി മനസ്സിലാക്കിയ ശേഷം കൂടുതൽ ശക്തമായ നിലപാട്​ സ്വീകരിക്കാനാണ്​ കോൺഗ്രസ്​ തീരുമാനം.

ചൊവ്വാഴ്​ച സംസ്ഥാന വ്യാപകമായി നടന്ന പ്രതിഷേധം പലയിടത്തും അക്രമാസക്തമായി. പൊലീസ്​ സംയമനം പാലിക്കുന്നതിനാൽ അനിഷ്​ടസംഭവങ്ങൾ ഒഴിവായി. എന്നാൽ,​ വിധി നടപ്പാക്കാനുള്ള നീക്കവുമായി സർക്കാർ മുന്നോട്ടു പോകുകയാണ്​. ശബരിമലയിലും പ്രധാന ഇടത്താവളങ്ങളിലും അടിസ്​ഥാന സൗകര്യം ഒരുക്കാനുള്ള നടപടിയും ആരംഭിച്ചു. പമ്പ, സന്നിധാനം, എര​ുമേലി എന്നിവടങ്ങളിൽ സൗകര്യം വർധിപ്പിക്കുകയാണ്​ ​ആദ്യനടപടി.

ശബരിമല സംരക്ഷണ സമിതി നേതൃത്വത്തിൽ പലയിടത്തും വഴിതടഞ്ഞായിരുന്നു സമരം. അഖിലേന്ത്യ ഹിന്ദു പരിഷത്തും സമരരംഗത്തുണ്ട്​. ബി.ജെ.പി വിഷയത്തിൽ പരസ്യനിലപാട്​ പ്രഖ്യപിച്ചിട്ടില്ല. എന്നാൽ, ബി.ജെ.പി-സംഘ്​​പരിവാർ പ്രവർത്തകരടക്കം വിവിധ ഹിന്ദു സംഘടനകളിലെ നിരവധി പേർ സമരത്തില്‍ പങ്കെടുക്കുന്നുണ്ട്​.

കൊച്ചി, കോട്ടയം, തിരുവനന്തപുരം, പാലക്കാട്, പന്തളം തുടങ്ങിയിടങ്ങളിൽ റോഡുകൾ ഉപരോധിച്ചു. തിരുവനന്തപുരത്ത്​ പ്രാർഥന യജ്‍ഞവും പന്തളത്ത്​ പന്തളം കൊട്ടാര പ്രതിനിധികളു​െട നേതൃത്വത്തിൽ നാമജപ ഘോഷയാത്രയും നടത്തിയായിരുന്നു പ്രതിഷേധം. യു.ഡി.എഫും സമരത്തെ പിന്തുണക്കുന്നുണ്ട്​. അയ്യപ്പഭക്തരുടെ നേതൃത്വത്തിൽ പമ്പ ഗണപതി ക്ഷേത്രത്തിന് സമീപത്തും ഉപവാസസമരം നടന്നു. കോട്ടയം നഗരത്തിൽ അഞ്ഞൂറോളം പ്രവർത്തകർ പ്രതിഷേധ പ്രകടനം നടത്തി. റോഡ്​ ഉപരോധിക്കാൻ ശ്രമിച്ചവരെ പൊലീസ്​ നീക്കം ചെയ്​തു.

ശബരിമലയിൽ ആചാരാനുഷ്​ഠാനങ്ങൾ നിലനിർത്തണമെന്നാവശ്യപ്പെട്ട്​ വിവിധ ഹൈന്ദവ സംഘടനകളുടെ നേതൃത്വത്തിൽ എരുമേലിയിൽ ബുധനാഴ്​ച​ രാവിലെ മുതൽ പ്രതിഷേധ പരിപാടി നടത്തും. എരുമേലി പേട്ട ധർമശാസ്​ത ക്ഷേത്രത്തിന്​ മുൻവശത്താണ്​ സമരം. ഒമ്പതിന്​ പി.സി. ജോർജ്​ എം.എൽ.എ വിശ്വാസസംരക്ഷണ സത്യഗ്രഹം നടത്തും.