ശബരിമല വിഷയം കത്തിക്കാൻ അയ്യപ്പസംഗമങ്ങളുമായി സംഘപരിവാർ

നെടുമ്പാശേരി: ശബരിമല വികാരം വീണ്ടും കത്തിക്കാൻ ഹിന്ദു ഐക്യവേദി രംഗത്ത്. ഇതിന്‍റെ ഭാഗമായി വിവിധയിടങ്ങളിൽ അയ്യപ്പ ഭക്ത സംഗമങ്ങൾ സംഘടിപ്പിക്കും. സംഘപരിവാർ പ്രവർത്തകർ മാത്രമായി സദസ് പരിമിതപ്പെടരുതെന്നാണ് കർശന നിർദേശം. എൻ.എസ്.എസ്, എസ്.എൻ.ഡി പി തുടങ്ങിയവയുടെ പ്രാദേശിക നേതൃത്വങ്ങൾക്ക്​ വേദിയിലിടം നൽകണമെന്നും നിർദേശമുണ്ട്. ശശികല ടീച്ചറെയാണ്​ മിക്ക സ്​ഥലങ്ങളിലും മുഖ്യപ്രഭാഷകയായി അവതരിപ്പിക്കുന്നത്​​.

കോടതി വിധി എന്തായാലും അയ്യപ്പഭക്തർക്കനുകൂലമായ നടപടിക്കായി നിയമ നിർമ്മാണം കൊണ്ടുവരുമെന്ന് യു.ഡി.എഫ് പ്രഖ്യാപിച്ചിട്ടുണ്ട്. ചർച്ച നടത്തി വിശ്വാസം സംരക്ഷിക്കുമെന്ന് എൽ.ഡി.എഫും വ്യക്തമാക്കിയിട്ടുണ്ട്. ഇൗ സാഹചര്യത്തിലാണ്​ വിശ്വാസികളെ കയ്യിലെടുക്കാൻ ഹിന്ദു ഐക്യ വേദി അയ്യപ്പ സംഗമമൊരുക്കുന്നത്. ശബരിമലയിൽ യുവതി പ്രവേശനം നടന്നപ്പോൾ അതിനെ ന്യായീകരിച്ച് പിണറായി വിജയൻ നടത്തിയ പ്രസംഗത്തിന്‍റെ വിഡിയോയും സൈബർ ഇടങ്ങളിൽ ബി.ജെ.പി പ്രചരിപ്പിക്കുന്നുണ്ട്.

അതേസമയം, ശബരിമലയില്‍ സ്ത്രീകള്‍ക്ക് പ്രവേശനം നല്‍കണമെന്ന നിലപാടാണ്​ ആര്‍.എസ്.എസ് കേന്ദ്രനേതൃത്വം പ്രകടിപ്പിച്ചിരുന്നത്​​. ഇക്കാര്യം പലതവണ ആവർത്തിച്ച്​ വ്യക്​തമാക്കുകയും​ ചെയ്​തിരുന്നു. രാജ്യത്തെ ഭൂരിപക്ഷം ക്ഷേത്രങ്ങളിലും സ്ത്രീപ്രവേശനം ആവാമെങ്കില്‍ ശബരിമലയുടെ കാര്യത്തില്‍ മറിച്ചൊരു നിലപാട് ആവശ്യമില്ലെന്നാണ്​ മുതിർന്ന ആര്‍.എസ്.എസ് നേതാവായ ഭയ്യാജി ജോഷി അഭിപ്രായപ്പെട്ടത്​. 'ഒരു ആചാരം തെറ്റാണെന്നു തോന്നിയാല്‍ അത് ഉപേക്ഷിക്കണം. നൂറുകണക്കിനു വര്‍ഷങ്ങളായി തുടരുന്നു എന്നതുകൊണ്ട് ആ ആചാരം ഇനിയും തുടരണം എന്ന നിലപാട് ആര്‍.എസ്.എസിന് സ്വീകാര്യമല്ല'' -എന്നാണ്​ ഭയ്യാജി ജോഷി പറഞ്ഞത്​.