ശബരിമലയിൽ നടത്തുന്നത്​ രണ്ടാം ബ്ലൂസ്​റ്റാർ ഓപറേഷൻ -കെ. സുധാകരൻ

കണ്ണൂർ: ശബരിമലയിൽ രണ്ടാം ‘ബ്ലൂ സ്​റ്റാർ ഓപറേഷനാ’ണ്​ സർക്കാർ നടത്തുന്നതെന്ന് കെ.പി.സി.സി വർക്കിങ്​ പ്രസിഡൻറ്​ കെ. സുധാകരൻ. ​കണ്ണൂരിൽ വാർത്താസമ്മേളനത്തിൽ സംസാരിക്കുകയായിരുന്നു അദ്ദേഹം. ആരാധനാലയങ്ങളെ തകർക്കുകയെന്ന ലക്ഷ്യത്തോടെയാണ്​ സർക്കാർ നീക്കം. പൊലീസുകാരുടെ സാന്നിധ്യമാണ് സന്നിധാനത്തെ പ്രധാന പ്രശ്നം. ഭക്തജനങ്ങളെ സംരക്ഷിക്കാൻ സാധിക്കാത്ത ദേവസ്വം മന്ത്രിയും ദേവസ്വം ബോർഡ് ചെയർമാനും രാജിവെച്ചൊഴിയണം.

ജനമനസ്സിലെ വിശ്വാസം തകർക്കുകയെന്നതാണ്​ ഇടതുപക്ഷ സർക്കാറി​​​​െൻറ അജണ്ട. ശബരിമല വിഷയം കാൻസർ പോലെ വ്യാപിക്കുകയാണ്​. ക്ഷേത്രഭരണം അവിശ്വാസികളുടെ കൈയിൽനിന്ന് മാറ്റണം. മന്ത്രിയും ചെയർമാനും രാജിവെക്കാത്തപക്ഷം ഇവരെ താഴെയിറക്കാൻ ശക്തമായ ജനമുന്നേറ്റമുണ്ടാകും. നേരത്തെ സന്നിധാനത്ത്​ ആർ.എസ്​.എസ്​, ബി.ജെ.പി പ്രവർത്തകർ നുഴഞ്ഞുകയറി കുഴപ്പങ്ങളുണ്ടാക്കിയിരുന്നു. എന്നാൽ, ഇപ്പോൾ ബി.ജെ.പിക്കാരോ നുഴഞ്ഞുകയറ്റുക്കാരോ ഇല്ല. കഴിഞ്ഞ ദിവസം രാത്രി അയ്യപ്പഭക്തരെ ഒരു പ്രകോപനവുമില്ലാതെയാണ്​ പൊലീസ്​ ഉന്നത ഉദ്യോഗസ്ഥരുടെ നേതൃത്വത്തിൽ ആക്രമിക്കുകയും അറസ്​റ്റ്​ ചെയ്യുകയും ചെയ്​തത്​.

മുമ്പ് പൊലീസുകാർ ശബരിമലയിൽ പാലിച്ചിരുന്ന കീഴ്​വഴക്കങ്ങളെല്ലാം അട്ടിമറിക്കപ്പെട്ടിരിക്കുകയാണ്. ഇപ്പോൾ കാക്കിയും ബൂട്ടും ബാറ്റണും ഉപയോഗിച്ചാണ്​ ഭക്തരെ നിയന്ത്രിക്കുന്നത്​. സ്വാമി എന്ന്​ വിളിച്ചിരുന്നവർ എടാ പോടാ എന്നാണ്​ ഇപ്പോൾ വിളിക്കുന്നത്​. പൊലീസുകാരുടെ വസ്ത്രങ്ങൾ ക്ഷേത്രപരിസരത്ത് ഉണങ്ങാനിടുന്നു. അയ്യപ്പന്മാർക്ക് പ്രാഥമിക കാര്യങ്ങൾ നിർവഹിക്കാൻ പോലുമുള്ള സൗകര്യമില്ല. ശബരിമലയിലെ നിലവിലെ പ്രശ്​നങ്ങൾ പരിഹരിക്കാൻ ഒാർഡിനൻസ്​ ഇറക്കുന്നതിൽ കേന്ദ്രസർക്കാറിന്​ എന്തു തടസ്സമാണുള്ളതെന്ന്​ കേന്ദ്രമന്ത്രി അൽഫോൻസ്​ കണ്ണന്താനം വ്യക്തമാക്കണം. സി.പി.എമ്മി​​​​െൻറ എന്തിനും തയാറായ ഒരുപറ്റമാളുകൾ അക്രമം ലക്ഷ്യമിട്ട്​ ആദിവാസികളുടെ സഹായത്തോടെ വനമേഖലയിൽകൂടി സന്നിധാനത്തേക്ക്​ നീങ്ങുന്നതായും സുധാകരൻ ആരോപിച്ചു.