എരുമേലിയിലെ നിരോധനാജ്ഞ പിൻവലിച്ചു

എരുമേലി: ഏഴുദിവസമായി എരുമേലിയിൽ നിലനിന്ന നിരോധനാജ്ഞയുടെ സമയപരിധി അവസാനിച്ചു. ഇതോടെ എരുമേലി വീണ്ടും സാധാരണനിലയിലായി. ശബരിമല യുവതി പ്രവേശനവുമായി ബന്ധപ്പെട്ട് ഉണ്ടായ പ്രതിഷേധത്തെ തുടർന്നാണ് എരുമേലിയിൽ ഏഴുദിവസത്തേക്ക് കലക്ടർ നിരോധനാജ്ഞ പ്രഖ്യാപിച്ചത്. എന്നാൽ, ഈ ദിവസങ്ങളിൽ എരുമേലിയിൽ അനിഷ്​ടസംഭവങ്ങളൊന്നുമുണ്ടായില്ല.

എന്നാൽ, യുവതി പ്രവേശനവുമായി ബന്ധപ്പെട്ട് എരുമേലി ശ്രീധർമശാസ്താ ക്ഷേത്രത്തിൽ രാവിലെയും വൈകീട്ടും ശബരിമല കർമസമിതിയുടെ നേതൃത്വത്തിൽ നാമജപയജ്ഞം നടക്കുന്നുണ്ട്. നിരോധനാജ്ഞ നിലനിൽക്കെ കഴിഞ്ഞദിവസങ്ങളിൽ പമ്പ ബസിൽ യുവതി എത്തിയത് പ്രതിഷേധത്തിനിടയാക്കിയെങ്കിലും എരുമേലിയിൽ യാത്ര അവസാനിപ്പിക്കുന്നുവെന്ന് അറിയിച്ചതോടെ പ്രതിഷേധക്കാർ പിന്മാറിയിരുന്നു.