ശബരിമല: സ്​ത്രീ പ്രവേശം അനുകൂലിച്ച്​​ ബി.ജെ.പി മുഖപത്രത്തിൽ ലേഖനം

കോഴിക്കോട്​: ശബരിമല സ്​ത്രീ പ്രവേശനത്തെ അനുകൂലിച്ച്​ ബി.ജെ.പി മുഖപത്രത്തിൽ ലേഖനം. വിധിയെ സംബന്ധിച്ച്​ നിലനിൽക്കുന്ന വിവാദങ്ങൾ അനാവശ്യമാണെന്നും ഇത്​ മുതലെടുക്കാൻ ചിലർ ശ്രമിക്കുകയാണെന്നും ലേഖനത്തിൽ പറയുന്നു​. ഭാരതീയ വിചാരകേന്ദ്രം ഡെപ്യൂട്ടി ഡയറക്ടർ ആർ. സഞ്​ജയനാണ്​ ലേഖനം എഴുതിയിരിക്കുന്നത്​.

ശബരിമലയിൽ അനാവശ്യ വിവാദങ്ങൾക്ക്​ പ്രസ​ക്​തിയില്ല എന്ന തലക്കെ​േട്ടാടെ തുടങ്ങുന്ന ലേഖനത്തിൽ സ്​ത്രീകൾ തീർഥാടനത്തിനെത്തുന്നത്​ ശബരിമലയുടെ മഹത്വവും പ്രശസ്​തിയും വർധിപ്പിക്കും​. ശബരിമല ക്ഷേത്രവുമായി ബന്ധപ്പെട്ട ആചാരാനുഷ്ഠാനങ്ങളെയോ അടിസ്ഥാന സങ്കൽപങ്ങളെയോ സുപ്രീം കോടതി ഉത്തരവ്​ ബാധിക്കുന്നില്ലെന്നും പ്രത്യാഘാതം പരിമിതമാണെന്നും ലേഖകൻ വ്യക്​തമാക്കുന്നു.

ശബരിമല വിഷയത്തിൽ രാഷ്​ട്രീയ പ്രചരണം ആരംഭിക്കാൻ ഒരുങ്ങിയിരിക്കുകയായിരുന്ന ബി.ജെ.പിക്ക്​ തിരിച്ചടി നൽകുന്നതാണ്​ മുഖപത്രത്തിൽ വന്ന ​ലേഖനം. അതേസമയം കോടതി വിധിയെ അനുകൂലിച്ച് തുടക്കത്തിൽ​ നിലപാടെടുത്ത ആർ.എസ്​.എസ്​. പിന്നീട്​ നിലപാട്​ മാറ്റി രംഗത്തുവന്നിരുന്നു. കോൺഗ്രസും വിശ്വാസികളുടെ പക്ഷത്താണെന്ന്​ അറിയിച്ചിട്ടുണ്ട്​.

വിധിയുടെ പിൻബലത്തിൽ ഹിന്ദു സമൂഹത്തിൽ ആശയക്കുഴപ്പം സൃഷ്​ടിക്കാൻ ചിലർ ശ്രമിക്കുന്നു. ഇത്​ അനുവദിച്ചുകൊടുക്കാൻ പാടില്ല. ഹിന്ദു സമൂഹത്തെ​േയാ ഹിന്ദു ധർമത്തെയോ പ്രതികൂലമായി ബാധിക്കുന്ന ഒന്നും വിധിയിലില്ലെന്നും ഇൗ വിധി വരുന്നതിന്​ മു​േമ്പ സ്​ത്രീകൾ കുട്ടികളുടെ ചോറൂണ്​ പോലുള്ള ചടങ്ങുകൾക്കായി ശബരിമലയിൽ പ്രവേശിക്കാൻ തുടങ്ങിയിരുന്നുവെന്നും ലേഖനത്തിലുണ്ട്​. എപ്പോൾ സന്ദർശിക്കണം എന്ന കാര്യം ഭക്തരായ സ്​ത്രീകൾക്ക്​ വിട്ടുനൽകുക. പുരുഷാധിപത്യത്തി​​​െൻറ കാലം അവസാനിച്ചുവെന്ന്​ മനസിലാക്കണമെന്നും ലേഖകൻ ചൂണ്ടിക്കാട്ടുന്നു.

കാലാനുസൃതമായ പരിഷ്​കാരങ്ങൾ നടപ്പിലാക്കികൊണ്ടാവണം ഹിന്ദുസമൂഹം ക്ഷേത്രാചാരങ്ങളെ സംരക്ഷിക്കേണ്ടത്​. യുക്തിഹീനമായ മാമൂലുകളെ അതേപടി നിലനിർത്താനുള്ള ചിലരുടെ ശ്രമങ്ങൾക്ക്​ ചൂട്ടുപിടിക്കുന്നത്​ സമൂഹത്തിൽ ജീർണ്ണതയും സംഘർഷവും ചൂഷണവും വർധിപ്പിക്കുന്നതിന്​ മാത്രമേ സഹായിക്കുകയുള്ളൂവെന്നും ലേഖനത്തിൽ പറയുന്നുണ്ട്​.