ഗായകൻ വേടന്‍റെ പാട്ടുകൾ ജാതി ഭീകരവാദം പ്രചരിപ്പിക്കുന്നവയാണെന്ന് ആർ.എസ്.എസ് നേതാവ്

കുണ്ടറ (കൊല്ലം): ഗായകൻ വേടന്‍റെ പാട്ടുകൾ ജാതി ഭീകരവാദം പ്രചരിപ്പിക്കുന്നവയാണെന്ന് ആർ.എസ്​.എസ്​ നേതാവും കേസരി വാരിക മുഖ്യപത്രാധിപരുമായ ഡോ. എൻ.ആർ. മധു. വേടന്‍റേത്​ വിഘടനവാദം പ്രചരിപ്പിക്കുന്ന സാഹിത്യമാണെന്നും വളർന്നുവരുന്ന തലമുറയുടെ മനസ്സിലേക്ക്​ വിഷം കുത്തിവെക്കുന്ന കലാഭാസമായി ഇത്​ അരങ്ങുവാഴുകയാണെന്നും കിഴക്കേക്കല്ലട പുതിയിടത്ത്​ ശ്രീപാർവതി ദേവീക്ഷേത്രത്തിലെ വേദിയിൽ നടത്തിയ പ്രസംഗത്തിൽ ഡോ. എൻ.ആർ. മധു പറഞ്ഞു.

‘നവോത്ഥാനം ചില സ്ഥലങ്ങളിലെങ്കിലും വഴിപിഴച്ചുപോകുന്നുണ്ടോയെന്ന്​ സംശയിക്കണം. കഴിഞ്ഞദിവസം ഒരു ​അമ്പലപ്പറമ്പിൽ വേടന്‍റെ ആട്ടും പാട്ടും കൂത്തുമുണ്ടായിരുന്നെന്നാണ്​ അറിഞ്ഞത്​. ആളുകൾ കൂടാൻ വേടന്‍റെ പാട്ട്​ വെക്കുന്നവർ ഒരുപക്ഷേ, ആളുകൂടാൻ കാബറെ ഡാൻസും അമ്പലപ്പറമ്പുകളിൽ വെക്കും. വേടനോട്​ വ്യക്തിപരമായ വിരോധമൊന്നുമില്ല. വേടൻ എന്ന കലാകാരന്‍റെ പിന്നിൽ ശക്തമായ സ്​പോൺസർ ശക്തികളുണ്ട്​.

സൂക്ഷ്മമായി പഠിച്ചാൽ ഈ രാജ്യത്ത്​ വിഘടനം സ്വപ്നംകണ്ട്​ കഴിയുന്ന ​തമോമയ ശക്തികൾ അയാളുടെ പിന്നിലുണ്ടെന്നത്​​ കൃത്യമാണ്​. അത്തരം കലാഭാസങ്ങൾ നമ്മുടെ നാലമ്പലങ്ങളിലേക്ക്​ കടന്നുവരുന്നതിനെ ചെറുത്തുതോൽപിക്കാൻ നമുക്ക്​ കഴിയണമെന്നും അദ്ദേഹം കൂട്ടിച്ചേർത്തു.

700 വർഷത്തോളം പഴക്കമുള്ള കിഴക്കേക്കല്ലട പുതിയിടത്ത്​ ശ്രീപാർവതി ദേവീക്ഷേത്രം കുറച്ചുകാലം മുമ്പ്​​ ആർ.എസ്​.എസ്​ ഏറ്റെടുത്ത്​ പുനരുദ്ധരിച്ച്​ ഭരണനിർവഹണം ​നടത്തിവരികയാണ്​. കഴിഞ്ഞ ദിവസങ്ങളിൽ ‘അപർണോത്സവം’ എന്ന പേരിൽ ക്ഷേത്രത്തിൽ നടന്ന പ്രതിഷ്ഠ വാർഷികത്തിന്റെ സമാപന സമ്മേളനം ഉദ്​ഘാടനം ചെയ്യവെയാണ്​ കേസരി വാരിക മുഖ്യപത്രാധിപർ ഡോ. എൻ.ആർ. മധു വേടനെതിരെ രൂക്ഷമായ പ്രതികരണം നടത്തിയത്​.