ആർ.എം.പിക്ക്​ മുന്നിൽ വാതിൽ തുറന്നിട്ട്​ യു.ഡി.എഫ്​

കാസർകോട്: ആർ.എം.പിക്ക്​ യു.ഡി.എഫ്​ മുന്നണിയിലേക്ക്​ വാതിൽ തുറന്നിട്ട്​ കെ.പി.സി.സി പ്രസിഡൻറ്​ മുല്ലപ്പള്ളി രാമചന്ദ്രൻ. അവർക്ക്​ എത്രകാലമാണ്​ ഒറ്റക്ക്​ നിൽക്കാനാവുകയെന്ന്​ ചോദിച്ച ​അദ്ദേഹം ആർ.എം.പിയുമായി ഇക്കാര്യത്തിൽ ചർച്ച നടത്തുമെന്നും വ്യക്തമാക്കി. യു.ഡി.എഫിലേക്ക്​ വരാൻ താൽപര്യമുള്ളവരുമായി ചർച്ച നടത്തുമെന്ന്​ പ്രതിപക്ഷനേതാവ്​ രമേശ്​ ചെന്നിത്തലയും പ്രതികരിച്ചു.

ആർ.എം.പിയുടെ കാര്യത്തിലും ഇതുതന്നെയാണ്​ യു.ഡി.എഫ്​ നിലപാട്​. യു.ഡി.എഫുമായി സഹകരിക്കാൻ തയാറായി ധാരാളം കക്ഷികൾ മുന്നോട്ടുവരുന്നുണ്ട്​. യു.ഡി.എഫി​​െൻറ വിജയസാധ്യത കണക്കിലെടുത്താണിത്​. യു.ഡി.എഫ്​ വിജയസാധ്യതയുള്ള മുന്നണിയായി വിലയിരുത്തുന്നതി​​െൻറ ഭാഗമാണിത്​ -അദ്ദേഹം പറഞ്ഞു. സഹകരിക്കാൻ തയാറുള്ള ആരുമായും ചർച്ച നടത്തുകയെന്നതാണ്​ യു.ഡി.എഫ്​ നിലപാടെന്ന്​ പി.കെ. കുഞ്ഞാലിക്കുട്ടി എം.പിയും വ്യക്തമാക്കി.

ഒരു മുന്നണിയിലേക്കുമില്ലെന്ന് ആർ.എം.പി.ഐ
വടകര: നിലവിലെ സാഹചര്യത്തില്‍ ഒരു മുന്നണിയുടെയും ഭാഗമാകില്ലെന്ന്​ ആര്‍.എം.പി.ഐ സംസ്ഥാന സെക്രട്ടറി എന്‍. വേണു. കെ.പി.സി.സി പ്രസിഡൻറ്​ മുല്ലപ്പള്ളി രാമചന്ദ്രൻ യു.ഡി.എഫിലേക്ക്​ ക്ഷണിച്ചതിനെക്കുറിച്ച ചോദ്യത്തോട്​ പ്രതികരിക്കുകയായിരുന്നു അദ്ദേഹം.

കേന്ദ്രത്തില്‍ ബി.ജെ.പിയുടെ ഫാഷിസ്​റ്റ്​ നയങ്ങള്‍ക്കെതിരായ പോരാട്ടത്തില്‍ മതേതര ശക്തികൾക്കൊപ്പം നില്‍ക്കേണ്ടത് അനിവാര്യമാണ്. കേരളത്തില്‍ സി.പി.എമ്മി‍​െൻറ കൊലപാതക രാഷ്​ട്രീയത്തിനെതിരെയാണ് നിലകൊള്ളുന്നത്. സി.പി.എമ്മിനും ബി.ജെ.പിക്കുമെതിരായ പോരാട്ടത്തില്‍ സമാനചിന്താഗതിക്കാരുമായി സഹകരിക്കും. അതൊരിക്കലും ഏതെങ്കിലും മുന്നണിയിലേക്കുള്ള പ്രവേശനമാകില്ലെന്നും വേണു പറഞ്ഞു.