ദേ, കൺമുന്നിൽ കടുവ

മൂന്നാർ: കൺമുന്നിൽ കടുവയെ കണ്ടതിന്‍റെ അമ്പരപ്പ്​ മാറിയിട്ടില്ല വയനാട് സ്വദേശിയായ റിയാസ് മുഹമ്മദിന്​​. കഴിഞ്ഞ വെള്ളിയാഴ്ച സുഹൃത്തുക്കളോടൊപ്പം കൊളുക്കുമലയിൽ ട്രക്കിങിന്​ പോയപ്പോഴാണ്​ അപ്രതീക്ഷിതമായി ഞെട്ടലുണ്ടാക്കുന്ന ആ കാഴ്ച കണ്ടത്​.

പ്രദേശത്തെ ദൃശ്യങ്ങൾ പകർത്തുന്നതിനിടെ കുറച്ച്​ ദൂരെ മാറി ചെറിയ മരച്ചുവട്ടിലായി കടുവ കിടക്കുന്നു. ഉടൻ തിരിഞ്ഞോടി. അറിയാതെയാണെങ്കിലും ദൃശ്യം മൊബൈലിൽ പതിയുകയും ചെയ്തു. ഇതിനകം 40 പ്രാവശ്യമെങ്കിലും ഇതേ സ്ഥലത്ത്​ പോയിട്ടുണ്ടെങ്കിലും ആദ്യമാ‍യാണ് ഇത്തരമൊരനുഭവമെന്ന് റി‍യാസ് ‘മാധ്യമ’ത്തോട് പറഞ്ഞു.

വയനാട് അട്ടമല സ്വദേശിയായ റിയാസിന്​ ചൂരൽമല ദുരന്തത്തിൽ വീടടക്കം എല്ലാം നഷ്ടപ്പെട്ടിരുന്നു. ഇപ്പോൾ കൽപറ്റയിൽ വാടകക്കാണ് കുടുംബം കഴിയുന്നത്.

കൊളുക്കുമല ഉൾപ്പെടുന്ന ദേവികുളം റേഞ്ചിൽ നേരത്തെ കടുവയുടെ സാന്നിധ്യമുണ്ട്. പ്രദേശത്ത് കടുവ പശുക്കളെ ആക്രമിച്ച് കൊല്ലുന്നതും പതിവാണ്. കേരള- തമിഴ്നാട് അതിർത്തി പ്രദേശമായ കൊളുക്കുമലയിലേക്ക് നിരവധി സഞ്ചാരികളാണ് ദിവസേന എത്തുന്നത്​.