റിയാദിൽ നിന്ന്​ കരിപ്പൂരിലെത്തിയ യാത്രക്കാരിൽ രണ്ട്​ പേരെ ഐസൊലേഷനിലേക്ക്​ മാറ്റി

കോഴിക്കോട്​: റിയാദിൽ നിന്ന്​ വെള്ളിയാഴ്​ച പ്രത്യേക വിമാനത്തിൽ കരിപ്പൂരിലെത്തിയ യാത്രക്കാരിൽ രണ്ട്​ പേരെ ഐസൊലേഷനിലേക്ക്​ മാറ്റി. കോവിഡ്​ ലക്ഷണങ്ങളെ തുടർന്നാണ്​ രണ്ട്​ പേരെയും മ​ഞ്ചേരി മെഡിക്കൽ കോളജിൽ ​പ്രവേശിപ്പിച്ചത്​. ഇവർക്ക്​ കോവിഡിൻെറ ഗുരുതരമായ ലക്ഷണങ്ങളൊന്നുമില്ലെന്ന്​ അധികൃതർ അറിയിച്ചു.

ഇതിൽ ഒരാൾക്ക്​ ചുമയും മറ്റൊരാൾക്ക്​ അലർജിയുമാണ്​ അനുഭവപ്പെട്ടത്​. ഇവരെ കൂടാതെ ഈ വിമാനത്തിലെത്തിയ മറ്റ്​ രണ്ട്​ പേരെയും ആശുപത്രിയിലാക്കിയിട്ടുണ്ട്​. അർബുദത്തിന്​ ചികിൽസ തേടിയിരുന്ന രോഗിയെ കോഴിക്കോട്​ മെഡിക്കൽ കോളജിലേക്ക്​ തുടർ ചികിൽസക്കായാണ്​ മാറ്റിയത്​. മറ്റൊരാൾ പൂർണ്ണ ഗർഭിണിയാണ്​. ഇവരെയും ആശുപത്രിയിൽ പ്രവേശിപ്പിച്ചു. 

84 ഗർഭിണികൾ ഉൾപ്പെടെ 152 യാത്രക്കാരുമായി റിയാദിൽ നിന്നുള്ള വിമാനം ഇന്നലെ രാത്രി എട്ട് മണിയോടെയാണ് കരിപ്പൂരിൽ ലാൻഡ് ചെയ്തത്. 20 പേരടങ്ങുന്ന സംഘമാണ് ആദ്യം പുറത്തിറങ്ങിയത്. നടപടിക്രമങ്ങളും ആരോഗ്യ പരിശോധനകളും പൂർത്തിയാക്കി പന്ത്രണ്ടരയോടെയാണ്​ അവസാന യാത്രക്കാരനും ക്വാറൻറീൻ കേന്ദ്രത്തിലെത്തിയത്​.