ഇടുക്കിയിലെ അനധികൃത കൈയേറ്റങ്ങൾ റവന്യു ദൗത്യസംഘം ഒഴിപ്പിക്കൽ തുടരുന്നു

തൊടുപുഴ: ഇടുക്കി ജില്ലയിലെ അനധികൃത കൈയേറ്റങ്ങൾ ഒഴിപ്പിക്കുന്നതിന് സർക്കാർ നിയോഗിച്ചിട്ടുള്ള റവന്യു സംഘം ദൗത്യം തുടരുന്നു. ഇന്ന് പള്ളിവാസൽ, ചിന്നക്കനാൽ വില്ലേജുകളിലെ കൈയേറ്റങ്ങളാണ് ഒഴിപ്പിച്ചത്. പള്ളിവാസൽ വില്ലേജിൽ ബ്ലോക്ക് 14 - ൽ സർവേ 36/3-ലെ 30.95 ആർ സ്ഥലത്തെ അനധികൃത കൈയേറ്റവും ഉടുമ്പൻചോല താലൂക്കിൽ ചിന്നക്കനാൽ വില്ലേജിലെ സ്വകാര്യ വ്യക്തി അനധികൃതമായി കൈവശം വച്ചിരുന്ന ചിന്നക്കനാൽ താവളം സർവേ 20/1, 11/1, 48 ൽ പ്പെട്ട 0.89.07 ഹെക്ടർ (1.76 ഏക്കർ റവന്യൂ പുറമ്പോക്ക് ഭൂമിയും 43.3 സെന്റ് കെ എസ് ഇ ബി സ്ഥലവും ഉൾപ്പടെ 2.20 ഏക്കർ) റവന്യു ദൗത്യസംഘം ഒഴിപ്പിച്ചു.

നിയമപരമായ യാതൊരു പിൻബലവും ഇല്ലാതിരുന്ന കൈയേറ്റങ്ങൾ എല്ലാ നടപടിക്രമങ്ങളും പൂർത്തിയാക്കിയാണ് ഒഴിപ്പിച്ചിട്ടുള്ളതെന്ന് കലക്ടർ ഷീബ ജോർജ് വ്യക്തമാക്കി . പട്ടയം ലഭിക്കുന്നതിനുള്ള അർഹത പരിശോധിച്ച് നിയമപരമായി മാത്രമേ ഒഴിപ്പിക്കൽ നടപടികൾ സ്വീകരിക്കുകയുള്ളൂ.