മിച്ചഭൂമി ഏറ്റെടുന്നതിലും വിതരണം ചെയ്യുന്നതിലും സംസ്ഥാനത്ത് ഗുരുതര വീഴ്ചയെന്ന് റിപ്പോർട്ട്

കോഴിക്കോട് : ഭൂപരിഷ്‌കരണ നിയമ പ്രകാരം മിച്ചഭൂമി ഏറ്റെടുക്കുന്നതിലും വിതരണം ചെയ്യുന്നതിനുമുള്ള സംസ്ഥാന ലാൻഡ് ബോർഡ് പ്രവർത്തനത്തിൽ ഗുരുതര വീഴ്ചയെന്ന് അക്കൗണ്ടന്റ് ജനറലിന്റെ (എ.ജി) റിപ്പോർട്ട്. സംസ്ഥാന ലാൻഡ് ബോർഡ് ഓഫിസിൽ നടത്തിയ പരിശോധനയിലാണ് ഇക്കാര്യം കണ്ടെത്തിയത്.

മിച്ചഭൂമി ഏറ്റെടുക്കുന്നതിലും വിതരണത്തിലുമുള്ള ഈ കാലതാമസം ഭൂപരിഷ്‌കരണ നിയമത്തിൻ്റെ ഫലപ്രാപ്തിയെ ദുർബലപ്പെടുത്തുകയാണ്. ഇത്ത്സം സംസ്ഥാനം മുന്നോട്ടുവച്ച സാമൂഹിക-സാമ്പത്തിക വികസന ലക്ഷ്യങ്ങളെ തടസപ്പെടുത്തുന്ന നിർണായക പ്രശ്നമാണെന്നും റിപ്പോർട്ടിൽ അടിവരയിട്ടു.

പരിധിയിൽ കൂടുതൽ ഭൂമി കൈവശം വച്ചിരിക്കുന്ന ഓരോ വ്യക്തിയും മൂന്ന് മാസത്തിനുള്ളിൽ ബോർഡിന് പ്രസ്താവന സമർപ്പിക്കണം. പ്രസ്താവന ലഭിച്ചാൽ, മിച്ചഭൂമി ഏറ്റെടുക്കുന്നതിനുള്ള നടപടിക്രമത്തിനായി അവ ബന്ധപ്പെട്ട താലൂക്ക് ലാൻഡ് ബോർഡിന് (ടി.എൽ.ബി) കൈമാറാൻ എസ്.എൽ.ബി ബാധ്യസ്ഥനാണ്.

എന്നാൽ, സംസ്ഥാന ലാൻഡ് ബോർഡ് (എസ്എൽബി) തിരുവനന്തപുരത്ത് നിന്നുള്ള ഡാറ്റയുടെ വിശകലനം, മിച്ചഭൂമി ഏറ്റെടുക്കുന്നതിലും പുനർവിതരണത്തിലും കാര്യമായ കാലതാമസം നേരിടുന്നുവെന്ന് വ്യക്തമായി. 2024 ആഗസ്റ്റ് വരെ, പ്രഖ്യാപിച്ച മിച്ചഭൂമിയുടെ 8691 ഏക്കർ(3517.157 ഹെക്ടർ) വിവിധ താലൂക്ക് ലാൻഡ് ബോർഡുകൾ ഇനിയും ഏറ്റെടുക്കാനുണ്ട്. ഇതുകൂടാതെ 2191 ഏക്കർ(887.04213 ഹെക്ടർ) സംസ്ഥാനത്തെ 14 ജില്ലകളിലായി വിതരണം ചെയ്യപ്പെടാതെ കിടക്കുന്നു.

മിച്ചഭൂമിയായി പ്രഖ്യാപിക്കപ്പെട്ടതിന്റെ ഗണ്യമായ ഒരു ഭാഗം അതാത് താലൂക്ക് ലാൻഡ് ബോർഡുകൾ (ടി.എൽ.ബി) ഇതുവരെ ഏറ്റെടുത്തിട്ടില്ല. ഈ കാലതാമസം ഭൂപരിഷ്കരണം നടപ്പാക്കാതിരിക്കുന്നതിനും അർഹരായ ഗുണഭോക്താക്കൾക്ക് ഭൂമി പുനർവിതരണം ചെയ്യുന്നത് തടയുന്നതിനും ഇടയാക്കും. കൈവശം വെക്കുന്നതിലെ കാലതാമസത്തിനു പുറമേ, 887.0421 ഹെക്ടർ മിച്ചഭൂമി വിതരണം ചെയ്തിട്ടില്ല.

ഈ വിതരണം ചെയ്യാത്തത് ഭൂപരിഷ്കരണ പ്രക്രിയയിലെ കാര്യക്ഷമതയില്ലായ്മയിലേക്ക് വിരൽ ചൂണ്ടുന്നു. ഇത് ഭൂരഹിതർക്കും പാർശ്വവൽക്കരിക്കപ്പെട്ട സമൂഹങ്ങൾക്കും ഉദ്ദേശിച്ചിട്ടുള്ള സാമൂഹിക-സാമ്പത്തിക നേട്ടങ്ങളെ ബാധിക്കാനിടയുണ്ട്. പാലക്കാട്, മലപ്പുറം, കാസർഗോഡ് തുടങ്ങിയ ജില്ലകളിൽ ഗണ്യമായ കുടിശ്ശികയുണ്ട്. ഈ വൈരുദ്ധ്യം ജില്ലാ തലത്തിലോ താലൂക്ക് തലത്തിലോ ഉണ്ടാകാൻ സാധ്യതയുള്ള ഭരണ തടസങ്ങളിലേക്കാണ് വിരൽ ചൂണ്ടുന്നത്.

ഭൂപരിഷ്‌കരണ നിയമത്തിന് അനുസൃതമായി ബാക്കിയുള്ള മിച്ചഭൂമി നിശ്ചിത സമയപരിധിക്കുള്ളിൽ താലൂക്ക് ലാൻഡ് ബോർഡുകൾ ഏറ്റെടുക്കുന്നുണ്ടെന്ന് ഉറപ്പാക്കാൻ സംസ്ഥാന ലാൻഡ് ബോർഡ് അടിയന്തര നടപടി സ്വീകരിക്കണമെന്നും വലിയ കുടിശ്ശികയുള്ള ജില്ലകൾ കേന്ദ്രീകരിച്ച് താലൂക്ക് ലാൻഡ് ബോർഡുകൾ മിച്ചഭൂമി വിതരണം വേഗത്തിലാക്കണമെന്നും ശുപാർശ ചെയ്തു.