പ്രശസ്ത ചിത്രകാരൻ അച്യുതൻ കൂടല്ലൂർ അന്തരിച്ചു

ചെന്നൈ: പ്രശസ്ത ചിത്രകാരൻ അച്യുതൻ കൂടല്ലൂർ ചെന്നൈയിൽ നിര്യാതനായി. 77 വയസ്സായിരുന്നു. രണ്ടു​ ദിവസം മുമ്പ്​ ദേഹാസ്വാസ്ഥ്യത്തെ തുടർന്ന്​ സ്വകാര്യ ആശുപത്രിയിൽ പ്ര​വേശിപ്പിച്ചിരുന്നു. തിങ്കളാഴ്ച പുലർച്ചയാണ്​ അന്ത്യം സംഭവിച്ചത്​. കേന്ദ്ര ലളിതകല അക്കാദമി പുരസ്കാരം (1988), തമിഴ്​നാട്​ ലളിതകല അക്കാദമി അവാർഡ്​ (1982), കേരള ലളിതകല അക്കാദമി ഫെലോഷിപ് ​(2017) എന്നീ പുരസ്കാരങ്ങൾക്ക്​ അർഹനായി. പാരിസ്​ ആർട്ട്​ ഗാലറി ഉൾപ്പെടെ ലോകമെമ്പാടും ഇദ്ദേഹത്തിന്‍റെ ചിത്രപ്രദർശന മേളകൾ സംഘടിപ്പിച്ചിട്ടുണ്ട്​. അവിവാഹിതനാണ്​.

പരേതരായ എം. പരമേശ്വരൻ നായരുടെയും കല്ലേക്കളത്തിൽ പാറുക്കുട്ടി അമ്മയുടെയും മകനായി 1945ൽ കൂടല്ലൂരിൽ ജനിച്ചു. തൃശൂർ മഹാരാജാസ്​ ടെക്​നോളജിക്കൽ ഇൻസ്റ്റിറ്റ്യൂട്ടിൽനിന്ന്​ ഡി​പ്ലോമ നേടിയതിനുശേഷം ചിത്രകലാരംഗത്തേക്ക്​ കടന്നു. കുട്ടിക്കാലത്ത് കവിതകൾ എഴുതുകയും വരക്കുകയും ചെയ്യുമായിരുന്നു. എന്നാൽ, കലയിൽ ആദ്യമായി ഔപചാരിക പരിശീലനം ലഭിച്ചത് എ.എം.ഐ.ഇയിൽനിന്ന് (അസോ. മെംബർ ഓഫ്​ ഇൻസ്റ്റിറ്റ്യൂഷൻ ഓഫ് എൻജിനീയേഴ്‌സ്​) സർട്ടിഫിക്കറ്റ് നേടുന്നതിനായി പഠിക്കാൻ ചെന്നൈയിലെത്തിയതിനുശേഷമാണ്​. പിന്നീട്​ ഫൈൻ ആർട്സ് കോളജിലെ മദ്രാസ് ആർട്സ് ക്ലബ്ബിലും ചേർന്നു. ദീർഘകാലമായി ചെന്നൈ തിരുവാൻമിയൂരിൽ കടലിനഭിമുഖമായ വീട്ടിലായിരുന്നു​ താമസം.

റിട്ട. അധ്യാപിക കുഞ്ഞുലക്ഷ്മി, വിലാസിനി, പരേതരായ ലീല ജി. നായർ, ഭാരതി എന്നിവർ സഹോദരിമാർ. മൃതദേഹം ചെന്നൈയിൽനിന്ന്​ കൊണ്ടുവന്ന്​ കൂടല്ലൂരിലെ വീട്ടുവളപ്പിൽ സംസ്​കരിക്കും.