റഫ്രിജറേറ്റർ പൊട്ടിത്തെറിച്ച് വീടി​ന്റെ മേൽക്കൂര തകർന്നു

റാന്നി: കരികുളത്ത് വീടിനുള്ളിൽ ഉപയോഗത്തിലിരുന്ന റഫ്രിജറേറ്റർ പൊട്ടിത്തെറിച്ചു. സ്ഫോടനത്തിൽ അടുക്കളയുടെ ഷിറ്റിട്ട മേൽക്കൂര തകർന്നു. റാന്നി പഴവങ്ങാടി ഗ്രാമപഞ്ചായത്ത് തുണ്ടിയിൽ ജിജി തോമസിന്റെ വീട്ടിലാണ് സംഭവം. ഇന്ന് പുലർച്ചയോടെയാണ് പൊട്ടിത്തെറിച്ചത്.

ഏകദേശം 3 ലക്ഷം രൂപ നഷ്ടം കണക്കാക്കുന്നതായി വീട്ടുടമ പറഞ്ഞു. വീടിന്റെ ആസ്ബസ്റ്റോസ് ഷീറ്റുകൾ തകരുകയും മിക്സി അടക്കമുള്ള വൈദ്യുതി ഉപകരണങ്ങൾ, വയറിങ് തുടങ്ങിയവ കത്തി നശിക്കുകയും ചെയ്തു. പൊട്ടിത്തെറിക്ക് കാരണ​മെന്തെന്ന് വ്യക്തമല്ല. ഗ്രാമപഞ്ചായത്ത് പ്രസിഡന്റ് അനിത അനിൽകുമാർ, റെജി കൊല്ലിരിക്കൽ എന്നിവർ സ്ഥലം സന്ദർശിച്ചു.

ഏതാനും മാസം മുമ്പ് ഉ​ദു​മ ഗ്രാ​മ​പ​ഞ്ചാ​യ​ത്ത്‌ ഓ​ഫി​സി​ന് തൊ​ട്ട​ടു​ത്തു​ള്ള ഇ​രു​നി​ല വീ​ട്ടി​ലെ റ​ഫ്രിജറേറ്റർ പൊട്ടി​ത്തെ​റി​ച്ച് അ​ടു​ക്ക​ള ക​ത്തി​ന​ശി​ച്ചിരുന്നു. സം​സ്ഥാ​ന പാ​ത​യോ​ര​ത്തെ ശ്രീ​ജ നി​ല​യ​ത്തി​ൽ പു​ല​ർ​ച്ചെ ആ​റി​നായിരുന്നു സംഭവം. പുക ഉയരുന്നത് കണ്ട് വീ​ട്ടു​കാ​രും സ​മീ​പ​വാ​സി​ക​ളും ചേ​ർ​ന്ന് തീ​യ​ണ​ച്ചു. റ​ഫ്രിജറേറ്ററും മ​റ്റു ഗൃ​ഹോ​പ​ക​ര​ണ​ങ്ങ​ളും പൂ​ർ​ണ​മാ​യും ക​ത്തി​ന​ശി​ച്ചു​.

ഈ വർഷം മേയിൽ കിളിമാനൂർ ന​ഗരൂർ കടവിള പുല്ലുതോട്ടം നാണിനിവാസിലും സമാനരീതിയിൽ റഫ്രിജറേറ്റർ പൊട്ടിത്തെറിച്ചിരുന്നു. സംഭവത്തിൽ വീട്ടമ്മ ​ഗിരിജ സത്യ(59)ന് ഗുരുതര പരിക്കേറ്റിരുന്നു. വീട്ടിന് പുറത്തുനിൽക്കുക​യായിരുന്ന ​ഗിരിജ ​എൽ.പി.ജി ​ഗ്യാസ് ലീക്കായ ​ഗന്ധം അനുഭവപ്പെട്ടതിനെ തുടർന്ന് പുറകു വശത്ത് അടുക്കളവാതിൽ തുറന്ന് അകത്ത് കടന്നപ്പോൾ ഉ​ഗ്ര ശബ്ദത്തോടെ റഫ്രിജറേറ്റർ പൊട്ടിത്തെറിക്കുകയായിരുന്നു. ശബ്ദം കേട്ട് അയൽവാസികൾ ഓടിയെത്തിയപ്പോൾ ദേഹമാസകലം പൊള്ളലേറ്റ നിലയിൽ ​ഗിരിജയെ കണ്ടെത്തുകയായിരുന്നു.

വീട്ടിലെ ഡബിൾ ഡോർ റഫ്രിജറേറ്റർ പൂർണമായും പൊട്ടിത്തകർന്ന് കത്തിയമർന്നു. ഉടൻ തന്നെ ആറ്റിങ്ങൽ അ​ഗ്നിരക്ഷാ നിലയത്തിൽ അറിയിക്കുകയും സ്റ്റേഷൻ ഓഫിസർ ജിഷാജ്, അസിസ്റ്റന്റ് സ്റ്റേഷൻ ഓഫിസർ മനോഹരൻപിള്ള തുടങ്ങിയവരുടെ നേതൃത്വത്തിൽ അ​ഗ്നിരക്ഷാസംഘം സ്ഥലത്തെത്തി തീയണച്ചു.