സ്​റ്റോക്കി​ലെ നഷ്ടം ബെവ്​കോ ജീവനക്കാരിൽനിന്ന് ഈടാക്കൽ: സർക്കുലർ റദ്ദാക്കിയത്​ ശരിവെച്ചു

കൊച്ചി: ബിവറേജസ് കോർപറേഷൻ ഔട്ട്​ലറ്റുകളിലെ സ്​റ്റോക്കിലുണ്ടാവുന്ന കുറവിന്‍റെ നഷ്ടം ജീവനക്കാരിൽനിന്ന് ഈടാക്കണമെന്ന മാനേജിങ്​ ഡയറക്ടറുടെ സർക്കുലർ​ റദ്ദാക്കിയത്​ ഹൈകോടതി ഡിവിഷൻ ബെഞ്ചും ശരിവെച്ചു.

സിംഗിൾ ബെഞ്ച് ഉത്തരവ് ചോദ്യംചെയ്ത് ബിവറേജസ് കോർപറേഷന്‍റെ അപ്പീൽ ഹരജി തള്ളിയാണ്​ ജസ്റ്റിസ് എസ്​.എ. ധർമാധികാരി, ജസ്റ്റിസ് വി.എം. ശ്യാംകുമാർ എന്നിവരടങ്ങുന്ന ഡിവിഷൻ​ ബെഞ്ചിന്റെ ഉത്തരവ്. ഇത്തരം സർക്കുലറുകൾക്ക് നിയമസാധുതയില്ലെന്ന് വിലയിരുത്തിയാണ് ഉത്തരവ്.

കണക്കുകളിൽ വൻ തുകയുടെ വ്യത്യാസമുണ്ടായാൽ നഷ്ടത്തിന്റെ 90 ശതമാനം ഔട്ട്​ലറ്റ് ജീവനക്കാരിൽനിന്ന് തുല്യമായും 10 ശതമാനം വെയർഹൗസ് മാനേജറിൽനിന്നും ഈടാക്കണമെന്ന്​ 2017ലാണ്​ മാനേജിങ്​ ഡയറക്ടർ സർക്കുലർ പുറപ്പെടുവിച്ചത്​. 2011ലും 16ലും സമാന സർക്കുലറുകൾ പുറപ്പെടുവിച്ചിരുന്നു.

ഇതിന്‍റെ അടിസ്ഥാനത്തിൽ സ്റ്റോക്കിൽ കുറവ് കണ്ടെത്തിയതിന് 53.21 ലക്ഷം രൂപ തിരിച്ചടക്കാൻ നോട്ടീസ് ലഭിച്ച ചങ്ങനാശ്ശേരി ഔട്ട്​ലറ്റിലെ ജീവനക്കാരുടെ ഹരജിയിലായിരുന്നു സിംഗിൾ ബെഞ്ചിന്റെ ഉത്തരവ്. എന്നാൽ, ജീവനക്കാർ നഷ്ടമുണ്ടാക്കിയാൽ അത് ഈടാക്കുന്നതിന് സർവിസ് ചട്ടങ്ങളിൽ വ്യവസ്ഥകളുണ്ടെന്നും ഇത് മറികടന്ന് നിയമപരമായ പിന്തുണയില്ലാതെ എം.ഡിക്ക്​ സർക്കുലർ പുറപ്പെടുവിക്കാനാകില്ലെന്നുമായിരുന്നു സിംഗിൾ ബെഞ്ചിന്‍റെ വിലയിരുത്തൽ. ഇത്​ ഡിവിഷൻബെഞ്ചും​ ശരിവെക്കുകയായിരുന്നു​.