കെ.എസ്​.ആർ.ടി.സിയിൽ റെക്കോർഡ്​ വരുമാനം

തിരുവനന്തപുരം: മേയിൽ കെ.എസ്.ആര്‍.ടി.സിക്ക് റെക്കോഡ്​ വരുമാനം. 207.35 കോടിയാണ് കോര്‍പറേഷന് ലഭിച്ചത്. 2017 മേയ് മാസവുമായി താരതമ്യപ്പെടുത്തുമ്പോള്‍ 21.74 കോടി രൂപ അധികം ലഭിച്ചു. വേനല്‍ക്കാലത്ത് കലക്​ഷന്‍ കൂടാറുണ്ടെങ്കിലും 200 കോടിക്ക് മുകളില്‍ ഉയരുന്നത് ആദ്യമായിട്ടാണ്. 2017 ഡിസംബറില്‍ കിട്ടിയ 195.21 കോടിയും, 2018 ജനുവരിയിലെ 195.94 കോടി രൂപയുമാണ് ഇതിനു മുമ്പുള്ള മികച്ച കലക്​ഷനുകള്‍. ശബരിമല പ്രത്യേക ബസുകളുടെ വരുമാനവും ഇതില്‍ ഉള്‍പ്പെട്ടിരുന്നു.

പരമാവധി ബസുകള്‍ നിരത്തിലിറക്കിയതും വരുമാനമുള്ള റൂട്ടുകള്‍ കേന്ദ്രീകരിച്ച് ഷെഡ്യൂളുകള്‍ പുനഃക്രമീകരിച്ചതുമാണ് വരുമാനവര്‍ധനക്ക്​ കാരണം. രണ്ടുമാസമായി ഘട്ടംഘട്ടമായി നടപ്പാക്കിവരുന്ന പരിഷ്‌കാരങ്ങളുടെ ഫലമാണ് ദിവസവരുമാനത്തില്‍ പ്രതിഫലിക്കുന്നത്. യൂനിയന്‍ പിന്തുണയോടെ അദര്‍ഡ്യൂട്ടിയില്‍ കഴിഞ്ഞിരുന്ന ഡ്രൈവര്‍മാരെയും കണ്ടക്ടര്‍മാരെയും ബസുകളില്‍ നിയോഗിച്ചതോടെ ജീവനക്കാരുടെ ക്ഷാമം കാരണം ബസ് റദ്ദാക്കുന്നത് കുറഞ്ഞു. ഷെഡ്യൂളുകള്‍ക്ക് അനുസൃതമായി ജീവനക്കാരുടെ പൊതുസ്ഥലംമാറ്റം നടത്തിയിരുന്നു.