ആംബുലന്‍സിലെ പീഡനം: ഡി.എം.ഒ സർക്കാറിന് പ്രാഥമിക റിപ്പോർട്ട്​ നൽകി

പത്തനംതിട്ട: കോവിഡ്​ രോഗിയായ പെൺകുട്ടിയെ ആംബുലന്‍സ് ഡ്രൈവർ പീഡപ്പിച്ച സംഭവത്തിൽ ഡി.എം.ഒ പ്രാഥമിക റിപ്പോർട്ട്​ സർക്കാറിന്​ നൽകി. കുട്ടിക്ക്​ കൗൺസിലിങ്​ നൽകിവരികയാണെന്നും കോവിഡ്​ ബാധിതരായ കുടുംബാംഗങ്ങൾക്കൊപ്പമാണ്​ പെൺകുട്ടിയെ താമസിപ്പിച്ചിരിക്കുന്നതെന്നും ഡി.എം.ഒ പറഞ്ഞു.

അടൂരിൽ നിന്ന്​ ലഭിച്ച പ്രാഥമിക റിപ്പോർട്ട്​ ആരോഗ്യ വകുപ്പിന്​ നൽകിയിട്ടുണ്ട്​. അത്യാഹിത വിഭാഗത്തിൽപെടുത്തേണ്ട രോഗികളെ മാത്രം രാത്രിയിൽ കോവിഡ്​ പരിപാലന കേന്ദ്രത്തിലേക്കോ ആശുപത്രിയിലേക്കോ മാറ്റിയാൽ മതിയെന്ന്​ അറിയിപ്പ്​ ആരോഗ്യവകുപ്പ്​ പുറത്തിറക്കി. അതിനിടെ പ്രതി നൗഫലിനെ അഞ്ചു ദിവസത്തേക്ക്​ കസ്​റ്റഡിയിൽ വാങ്ങാൻ പൊലീസ്​ തിങ്കളാഴ്​ച അടൂർ ചീഫ്​ ജുഡീഷ്യൽ മജിസ്​ട്രേറ്റ്​ കോടതിയിൽ അപേക്ഷ നൽകും.

പത്തനംതിട്ട ജില്ലയിലെ കോവിഡ്​ ചികിത്സാ കേന്ദ്രത്തിലെ ​ആരോഗ്യ പ്രവർത്തകരുടെ പ്രത്യേക യോഗം കലക്​ടർ വിളിച്ചു ചേർത്തു. കോവിഡ്​ ഫസ്​റ്റ്​ലൈൻ ട്രീറ്റ്​മെൻറ്​ സെൻററുകളുടെയും ആശുപത്രികളുടെയും നില മൊത്തത്തിൽ മെച്ച​െപ്പടുത്തുക, കോവിഡ്​ ബാധിതരെ ആശുപത്രികളിലേക്കോ, ട്രീറ്റ്​മെൻറ്​ സെൻററുകളിലേക്കോ മാറ്റുന്നതിൽ കൂടുതൽ ജാഗ്രത പുലർത്തുക, രോഗികളെ മാറ്റുന്നതിൽ പാലിക്കേണ്ട മാനദണ്ഡങ്ങൾ കൃത്യമായി പാലിക്കുന്നുണ്ടോ എന്ന്​ ഉറപ്പാക്കുക തുടങ്ങിയ കാര്യങ്ങൾ യോഗം ചർച്ചചെയ്യും. ഉച്ചക്ക്​ 12 മണിക്ക് വീഡിയോ കോൺഫറൻസ്​ യോഗമാണ്​ വിളിച്ചിട്ടുള്ളത്​.

പെൺകുട്ടിയുടെ മാതാപിതാക്കൾ അടക്കം കുടുംബാംഗങ്ങൾ എല്ലാവർക്കും കോവിഡ്​ സ്​ഥിരീകരിച്ചതിനാൽ അവരെല്ലാം ട്രീറ്റ്​മെൻറ്​ സെൻററിലായിരുന്നു. പെൺകുട്ടിയെ അടൂരിലെ ബന്ധുവീട്ടിലാക്കിയിരിക്കുകയായിരുന്നു. ആ വീട്ടിലെ വീട്ടമ്മയുടെയും പെൺകുട്ടിയുടെയും പരിശോധനാഫലം പോസീറ്റീവായി. ഇരുവരെയും ആശുപത്രികളിലേക്ക്​ കൊണ്ടുപോകവെ വീട്ടമ്മയെ കോഴഞ്ചേരിയിലെ ആശുപത്രിയിൽ ഇറക്കിയ ശേഷം പെൺകുട്ടിയുമായി പന്തളത്തെ ആശുപത്രിയിലേക്ക്​ പോകവെയാണ്​ ആംബുലൻസ്​ ഡ്രൈവർ പൈശാചിക കൃത്യം നടത്തിയത്​.