ഒരാഴ്ച കഴിഞ്ഞിട്ടും രഞ്ജിതയുടെ മൃതദേഹം തിരിച്ചറിഞ്ഞില്ല; ഡി.എൻ.എ പരിശോധനക്ക്​ അമ്മയുടെ രക്​തസാമ്പ്​ൾ ശേഖരിച്ചു

പത്തനംതിട്ട: അഹ്മദാബാദ്​ വിമാനപകടത്തിൽ ​​കൊല്ലപ്പെട്ട പത്തനംതിട്ട പുല്ലാട് കുറങ്ങഴക്കാവ് കൊഞ്ഞോൺ വീട്ടിൽ ര‍ഞ്ജിത ആർ. നായരുടെ​(39) മൃതദേഹം തിരിച്ചറിയാനുള്ള കാത്തിരിപ്പ്​ തുടരുന്നതിടെ, ഡി.എൻ.എ പരിശോധനക്കായി അമ്മയുടെ രക്​തസാമ്പ്​​ളും ശേഖരിച്ചു. സഹോദരന്‍റെ ഡി.എൻ.എ സാമ്പ്​ൾ ഉപയോഗിച്ച്​ നടത്തിയ പരിശോധന വിഫലമായതോടെയാണ്​ ശനിയാഴ്ച അമ്മ തുളസിയുടെ രക്‌തസാമ്പ്​ൾ ശേഖരിച്ചത്​. ഇത്​ ആരോഗ്യപ്രവർത്തകരു​ടെ നേതൃത്വത്തിൽ വിമാനത്തിൽ അഹ്മദാബാദിൽ​ എത്തിക്കും.

കഴിഞ്ഞ ശനിയാഴ്ചയാണ് രഞ്ജിതയുടെ സഹോദരൻ രതീഷിന്റെ രക്‌തസാമ്പ്​ൾ അഹ്മദാബാദ്​ സിവിൽ ആശുപത്രിയിൽ ശേഖരിച്ചത്​. അപകടസ്ഥലത്തുനിന്ന്​ ലഭിച്ച പല ശരീരഭാഗങ്ങളും ഡി.എൻ.എ ശേഖരിക്കാൻ കഴിയാത്ത അവസ്ഥയിലാണ്​. പലതിലും ഫലം ലഭിക്കുന്നുമില്ല. ഇതോടെയാണ്​ മറ്റ്​ ബന്ധുക്കളുടെ രക്​തസാമ്പ്​ളുകൾകൂടി ശേഖരിച്ച്​ പരിശോധിക്കാനുള്ള തീരുമാനം. ഡി.എൻ.എ സാമ്പ്​ൾ നൽകാനായി അഹ്മദാബാദിലെത്തിയ രഞ്ജിതയുടെ സഹോദരൻ രതീഷും ബന്ധു ഉണ്ണിക്കൃഷ്‌ണനും അവിടെ തുടരുകയാണ്​.

അതിനിടെ, രഞ്ജിതയുടെ കുടുംബാംഗങ്ങളെ ആശ്വസിപ്പിക്കാനായി ഇപ്പോഴും നിരവധിപേരാണ്​ വീട്ടിലെത്തുന്നത്​. രഞ്‌ജിതയുടെ സംസ്​ക്കാരചടങ്ങുകൾക്കായി പൂർത്തിയാകാത്ത വീടിനുമുന്നിലും പഠിച്ച സ്‌കൂളിലും പന്തൽ അടക്കമുള്ള ക്രമീകരണങ്ങളും ഒരുക്കിയിരുന്നു.

ഡി.എൻ.എ പരിശോധനാഫലം ലഭിച്ചതിനുശേഷമേ, സംസ്‌കാരം അടക്കമുള്ള കാര്യങ്ങളിൽ തീരുമാനമെടുക്കാൻ കഴിയു എന്നതിനാൽ ബന്ധുക്കളും നാട്ടുകാരുമുൾപ്പെടെ കാത്തിരിപ്പാണ്‌. ഇതിനിടെ,​ മക്കളായ ഇന്ദുചൂഢൻ, ഇതിക, അമ്മ തുളസി എന്നിവർ ​ നൊമ്പരക്കാഴ്ചയാവുകയാണ്​.