സംവിധായകൻ രഞ്​ജിത്​ പിൻമാറി; കോഴിക്കോട്​ നോർത്തിൽ പ്രദീപ്​ തന്നെ മത്സരിക്കണമെന്ന്​

കോഴിക്കോട്​: കോഴിക്കോട്​ നോർത്ത്​ മണ്ഡലത്തിൽ നിന്ന്​ ഇടതുപക്ഷ സ്​ഥാനാർഥിയായി മത്സരിക്കുന്നതിൽ നിന്ന്​ സംവിധായകൻ രഞ്​ജിത്​ പിൻമാറി. പ്രദീപ്​കുമാർ തന്നെ മത്സരിക്കണമെന്നാണ്​ ആഗ്രഹമെന്ന്​ അദ്ദേഹം മാധ്യമപ്രവർത്തകരോട്​ പറഞ്ഞു.

കോഴിക്കോട്​ നോർത്തിൽ ഇടത്​ സ്​ഥാനാർഥിയായി രഞ്​ജിതിനെ ജില്ലാ കമ്മിറ്റി നിർദേശിച്ചിരുന്നു. സി.പി.എം നേതൃത്വം ബന്ധപ്പെട്ടിരുന്നതായി രഞ്​ജിത്​ തന്നെ കഴിഞ്ഞ ദിവസം സ്​ഥിരീകരിക്കുകയും ചെയ്​തു. മൂന്ന്​ ടേം പൂർത്തിയാക്കിയ പ്രദീപ്​ കുമാറിന്​ പകരമാണ്​ രഞ്​ജിതിനെ സി.പി.എം പരിഗണിച്ചത്​.

എന്നാൽ, പ്രദീപ്​കുമാറിനെ തന്നെ വീണ്ടും മത്സരിപ്പിക്കണമെന്ന ആവശ്യം സാമുഹിക മാധ്യമങ്ങളിലടക്കം ശക്​തമായ സാഹചര്യത്തിലാണ്​ രഞ്​ജിത്​ പിൻമാറുന്നത്​. മൂന്ന്​ ടേം എം.എൽ.എയായ പ്രദീപ്​ കുമാറിന്​ ഇളവ്​ നൽകി വീണ്ടും മത്സരിപ്പിക്കണമെന്ന്​ ജില്ലാ സെക്രട്ടറിയേറ്റ്​ സംസ്​ഥാന നേതൃത്വത്തോട്​ ആവശ്യപ്പെടും.