മുഖ്യമന്ത്രി കുറ്റവാളികളെ സംരക്ഷിക്കുന്നു -ചെന്നിത്തല 

തിരുവനന്തപുരം: എറണാകുളം മഹാരാജാസ് കോളജിലെ വിദ്യാർഥികളുടെ ഹോസ്​റ്റലില്‍ പൊലീസ് കണ്ടെടുത്തത് നിര്‍മാണ സാമഗ്രികളാണെന്ന് നിയമസഭയെ തെറ്റിദ്ധരിപ്പിച്ച മുഖ്യമന്ത്രി പിണറായി വിജയന്‍ സഭയുടെ അവകാശ ലംഘനമാണ് നടത്തിയിരിക്കുന്നതെന്ന് പ്രതിപക്ഷ നേതാവ് രമേശ് ചെന്നിത്തല . 

പൊലീസ് കോടതിയല്‍ സമര്‍പ്പിച്ച എഫ്.ഐ.ആറില്‍ മാരകായുധങ്ങളാണ് കണ്ടെത്തിയതെന്ന് പറയുമ്പോഴാണ് പൊലീസി​​​​െൻറ ചുമതലയുള്ള മുഖ്യമന്ത്രി നിര്‍മാണ സാമഗ്രികളാണെന്ന് നിയമസഭയില്‍ പറഞ്ഞത്. അക്രമം നടത്താന്‍ മാരകായുധങ്ങള്‍ ശേഖരിച്ചു​െവച്ച കുറ്റവാളികളെ സംരക്ഷിക്കുകയാണ് മുഖ്യമന്ത്രി ചെയ്തത്.

ഇത് ഒരു മുഖ്യമന്ത്രിക്കു ചേര്‍ന്നതല്ല. കലാലയങ്ങളെ കലാപകേന്ദ്രങ്ങളാക്കാന്‍ ഭരണത്തിനു നേതൃത്വം നല്‍കുന്ന മുഖ്യമന്ത്രി ഒത്താശ ചെയ്യുന്നത് ദൗര്‍ഭാഗ്യകരമാണെന്നും ചെന്നിത്തല ​പ്രസ്​താവനയിൽ പറഞ്ഞു.