കോവിഡ് അനുബന്ധ മരണത്തിനും സഹായം നൽകണമെന്ന് ചെന്നിത്തല

തിരുവനന്തപുരം: കോവിഡ് അനുബന്ധ മരണങ്ങളും കോവിഡ് മരണമായി കണക്കാക്കണമെന്ന്​ മുതിർന്ന കോൺഗ്രസ്​ നേതാവ്​ രമേശ്​ ചെന്നിത്തല. കോവിഡ് ബാധിച്ച്​ മരിക്കുന്നവരുടെ ആശ്രിതര്‍ക്ക് നഷ്​ടപരിഹാരം നല്‍കണമെന്ന് തുടക്കത്തിലേ പ്രതിപക്ഷം ആവശ്യപ്പെട്ടിരുന്നതാണ്​. ഇപ്പോള്‍ സുപ്രീംകോടതി തന്നെ ആ നിർദേശം നല്‍കിയതില്‍ സന്തോഷമുണ്ട്​. കോവിഡ് നെഗറ്റീവായ ശേഷവും തുടര്‍ ആരോഗ്യപ്രശ്‌നങ്ങളാല്‍ ഉണ്ടാകുന്ന മരണവും കോവിഡ് മരണമായി തന്നെ കണക്കാക്കി അര്‍ഹരായവര്‍ക്ക് സാമ്പത്തികസഹായം നല്‍കണമെന്നും രമേശ് ആവശ്യപ്പെട്ടു.

വോട്ടർമാരുടെ ഡേറ്റ കൈകാര്യം ചെയ്യാൻ നിയമിക്കപ്പെട്ട താൽക്കാലിക ജീവനക്കാരെ പിരിച്ചുവിടുന്നത് ശരിയല്ലെന്ന്​ ചെന്നിത്തല പറഞ്ഞു. വോട്ടർപട്ടിക ആരും ചോർത്തി നൽകിയതല്ല. ​െതരഞ്ഞെടുപ്പ് കമീഷൻ നാലര ലക്ഷം വോട്ടർമാരെ ഒഴിവാക്കുകയാണ് വേണ്ടത്. ഇതി​െൻറ പേരിൽ കരാർ ജീവനക്കാരെ ശിക്ഷിക്കാൻ പാടില്ല.

വോട്ടർപട്ടിക ശുദ്ധീകരിക്കുകയാണ് വേണ്ടത്​. എങ്ങനെ വ്യാജന്മാർ വോട്ടർപട്ടികയിൽ വന്നു എന്നതാണ് അന്വഷിക്കേണ്ടതെന്നും അദ്ദേഹം മാധ്യമങ്ങളോട്​ പറഞ്ഞു. മുഖ്യ തെരഞ്ഞെടുപ്പ്​ ഒാഫിസറുടെ ഒാഫിസ്​, കലക്​ടറേറ്റുകൾ, താലൂക്ക്​ ഒാഫിസുകൾ എന്നിവിടങ്ങളിൽ ​ജോലി ചെയ്​തിരുന്നവരെയാണ്​ പിരിച്ചുവിടാൻ തീരുമാനിച്ചതെന്നും ചെന്നിത്തല ചൂണ്ടിക്കാട്ടി.