മോദിയുടെ അനുസരണയുള്ള കുട്ടിയാണ്​ പിണറായി​; വർഗീയ വോട്ടുകൾ ഞങ്ങൾക്ക്​ വേണ്ട -രമേശ്​ ചെന്നിത്തല

ആലപ്പുഴ: മോദിയുടെ അനുസരണയുള്ള കുട്ടിയാണ്​ പിണറായിയെന്ന്​ പ്രതിപക്ഷ നേതാവ്​ രമേശ്​ ചെന്നിത്തല. കേരളത്തിലെ പ്രതിപക്ഷത്തെ പറ്റി പറയു​േമ്പാൾ മാത്രമാണ്​ പിണറായിക്ക്​ ക്ഷൗര്യമുണ്ടാകാറുള്ളതെന്നും അദ്ദേഹം പറഞ്ഞു. വാർത്താ സമ്മേളനത്തിൽ സംസാരിക്കുകയായിരുന്നു അദ്ദേഹം.

നാളിതുവരെ കേരളത്തെ അവഗണിച്ച പ്രധാനമന്ത്രി ഇപ്പോൾ ഇവിടെ വികസനം ഉണ്ടാകുമെന്ന്​ പറയുന്നത്​ അവിശ്വസനീയമാണ്​. കേന്ദ്രം കേരളത്തെ എപ്പോഴും അവഗണിക്കുകയായിരുന്നു. കണക്ക്​ പറഞ്ഞ്​ വാങ്ങാൻ സംസ്​ഥാന സർക്കാറിനും ശേഷിയുണ്ടായിരുന്നില്ല. ലാവ്​ലിൻ കേസ്​ നീട്ടിവെക്കുന്നതിൽ മാത്രമായിരുന്നു പിണറായിക്ക്​ ശ്രദ്ധയെന്നും ചെന്നിത്തല പറഞ്ഞു.

ജി.എസ്​.ടിയിൽ നിന്ന്​ അർഹമായ നഷ്​ടപരിഹാരം നേടിയെടുക്കാനായില്ല. എയിംസ്​ കൊണ്ടുവരാനായില്ല. റബർ പോലുള്ളവയുടെ വിലയിടിവിന്​ പരിഹാരമുണ്ടാക്കാൻ കേന്ദം ഒന്നും ചെയ്​തില്ല. എന്നാൽ, മോഡിയെ കുറിച്ച്​ പിണറായി ഒന്നും പറയുന്നത്​ കേട്ടില്ല. പിണറായിയും മോഡിയും ഭായി-ഭായി കളിക്കുകയാണ്​.

ഏ​റ്റുവുമൊടുവിൽ സ്വർണകള്ളകടത്തു കേസ്​ ബി.ജെ.പിയുമായി ഒത്തു ചേർന്ന്​ മരവിപ്പിച്ചു. പകരം ബി.​െജ.പിക്ക്​ ഏതാനും സീറ്റുകൾ എന്നതാണ്​ ധാരണ. രാജ്യത്തെ കോൺഗ്രസ്​ സർക്കാറുകളെ അസ്​ഥിരപ്പെടുത്തുന്ന ഇ.ഡി എന്തുകൊണ്ടാണ്​ കേരളത്തിലെ ഭരണാധികാരികൾക്ക്​ നേരെ കണ്ണടക്കുന്നത്​ എന്നത്​ പകൽ പോലെ വ്യക്​തമാണ്​.

ശബരിമലയിലെ ആചാരങ്ങൾ ചവിട്ടിമെതിച്ചാൽ കൈയ്യും കെട്ടി നോക്കി നിൽക്കില്ലെന്നാണ്​ പ്രധാനമന്ത്രി പറയുന്നത്​. ഇത്​ ആരു വിശ്വസിക്കും. നിയമ നിർമാണം നടത്തി പ്രധാനമന്ത്രിക്ക്​ ശബരിമലയെ സംരക്ഷിക്കാമായിരുന്നു. യു.ഡി.എഫ്​ അധികാരത്തിൽ വന്നാൽ ശബരിമലക്കായി നിയമ നിർമാണം നടത്തുമെന്നും അദ്ദേഹം പറഞ്ഞു.

വർഗീയ വോട്ടുകൾ ഞങ്ങൾക്ക്​ വേണ്ട. കോൺഗ്രസ്​ മുക്​ത ഭാരതത്തിനായി പണിയെടുക്കുന്നവർ ഞങ്ങൾക്ക്​ വോട്ടുചെയ്യുമെന്ന്​ നിങ്ങൾക്ക്​ തോന്നുന്നുണ്ടോയെന്നും അദ്ദേഹം ചോദിച്ചു. എൻ.ഡി.എ സ്​ഥാനാർഥികളുടെ നാമനിർദേശ പത്രിക തള്ളിയ സ്​ഥലങ്ങളിൽ സി.പി.എം സ്​ഥാനാർഥികളെ തോൽപിക്കണമെന്ന സുരേഷ്​ ഗോപിയുടെ പ്രസ്​താവനയെകുറിച്ച്​ ചോദിച്ചപ്പോഴായിരുന്നു അദ്ദേഹത്തിന്‍റെ പ്രതികരണം. ഡീൽ സി.പി.എമ്മും ബി.ജെ.പിയും തമ്മിലാണ്​. സുരേഷ്​ഗോപിയുടെ പ്രസ്​താവന ഗൗരവമായി എടുക്കുന്നില്ലെന്നും രമേശ്​ ചെന്നിത്തല പറഞ്ഞു.

ആഴക്കടൽ മത്സ്യബന്ധനവുമായി ബന്ധപ്പെട്ട്​ ഇ.എം.സി.സിയുമായി ഒപ്പിട്ട ധാരണാ പത്രം ഇതുവരെ റദ്ദാക്കിയിട്ടില്ലെന്നും അദ്ദേഹം പറഞ്ഞു. യാനങ്ങൾ നീർമിക്കാനായി ഒപ്പിട്ട ധാരണാ പത്രം മാത്രമാണ്​ റദ്ദാക്കിയത്​. അമേരിക്കൻ കമ്പനിക്ക്​ മത്സ്യത്തൊഴിലാളികളെ പണയപ്പെടുത്തുകയാണ്​ സർക്കാർ. ഇതിന്‍റെ പി​റകിൽ വൻ കോഴ ഉള്ളതുകൊണ്ടാണ്​ ധാരണാപത്രം റദ്ദാക്കാത്തത്​. 4,34,000 വ്യാജ വോട്ടർമാരുടെ വിശദാംശങ്ങൾ പുറത്തുവിടുമെന്നും തെരഞ്ഞെടുപ്പ്​ കമീഷൻ പറയുന്ന കണക്കുകൾ തെറ്റാണെന്നും അദ്ദേഹം പറഞ്ഞു.