രാമങ്കരി പഞ്ചായത്തിൽ സി.പി.എം പിന്തുണയോടെ കോൺഗ്രസിന്‍റെ അവിശ്വാസപ്രമേയം പാസായി

ആലപ്പുഴ: സി.പി.എം ഭരിക്കുന്ന രാമങ്കരി പഞ്ചായത്ത്​ പ്രസിഡന്‍റ്​​​ ആർ. രാജേന്ദ്ര കുമാറിനെതിരെ കോൺഗ്രസ്​ കൊണ്ടുവന്ന അവിശ്വാസപ്രമേയം പാസായി. നാല്​ സി.പി.എം അംഗങ്ങളും നാല് കോൺഗ്രസ് അംഗങ്ങളും അവിശ്വാസപ്രമേയത്തെ പിന്തുണച്ച് വോട്ട് ചെയ്തു. ഇതോടെ, 25 വർഷം തുടർച്ചയായി സി.പി.എം ഭരിച്ച രാമങ്കരി പഞ്ചായത്ത്​ ഭരണമാണ്​ കടുത്ത വിഭാഗീയതയിൽ പാർട്ടിക്ക്​ നഷ്ടമായത്​.

പ്രസിഡന്റ് രാജേന്ദ്രകുമാറും നാല് സി.പി.എം അംഗങ്ങളും അവിശ്വാസപ്രമേയത്തെ എതിർത്ത് വോട്ട് രേഖപ്പെടുത്തി. കൗൺസിൽ യോഗത്തിൽ അവിശ്വാസം പാസായതോടെ പ്രസിഡന്‍റ്​​​ ആർ. രാജേന്ദ്രകുമാർ പഞ്ചായത്ത് അംഗത്വം രാജിവച്ചു. രാജേന്ദ്രകുമാർ സി.പി.ഐയിൽ ചേർന്ന്​ ​​പ്രവർത്തിക്കാൻ തീരുമാനിച്ചിട്ടുണ്ട്.

കഴിഞ്ഞ പഞ്ചായത്ത് തെരഞ്ഞെടുപ്പിൽ 22 വോട്ടിനാണ് രാജേന്ദ്ര കുമാർ വിജയിച്ചത്. പാർട്ടി ശക്തികേന്ദ്രമായ വാർഡിൽ 250 വോട്ടുകളുടെ ഭൂരിപക്ഷം ലഭിക്കേണ്ടതാണെന്നും പാർട്ടിയിലെ വിഭാഗീയതയാണ് ഭൂരിപക്ഷം കുറച്ചതെന്നുമാണ് രാജേന്ദ്രകുമാർ ആരോപിക്കുന്നത്.

2023 സെപ്​റ്റംബറിലാണ്​ കുട്ടനാട്ടിലെ സി.പി.എമ്മിലെ വിഭാഗീയത പൊട്ടിത്തെറിയിലെത്തിയത്​. കടുത്ത വിഭാഗീയതയെ തുടർന്ന്​ പാർട്ടി ശക്തികേ​ന്ദ്രമായ രാമങ്കരിയൽ നിന്ന്​​ ജനപ്രതിനിധികളടക്കം 222 പേർ കൂട്ടത്തോടെ സി.പി.ഐയിൽ ചേർന്നതായിരുന്നു തുടക്കം. ആർ. രാജേ​ന്ദ്രകുമാറടക്കം ആറ്​ ജനപ്രതിനിധികളും രണ്ട്​ ഏരിയ കമ്മിറ്റി അംഗങ്ങളും 19 ​ലോക്കൽ കമ്മിറ്റി അംഗങ്ങളും ഉൾപ്പെടെയുള്ളവരാണ്​ സി.പി.ഐയിൽ അംഗത്വമെടുത്തത്​.