ജെബി മേത്തർ, ഹസൻ, ലിജു: രാജ്യസഭാ സീറ്റിലേക്ക് മൂന്നംഗ പാനൽ കെ.പി.സി.സി ഹൈകമാൻഡിന്​ കൈമാറി

തിരുവനന്തപുരം: രാജ്യസഭാ സീറ്റിലേക്ക്​ ഹൈകമാൻഡ്​ നിർദ്ദേശിച്ച ശ്രീനിവാസൻ കൃഷ്ണന്‍റെ പേര്​ ഒഴിവാക്കി മൂന്നംഗ പാനൽ ഹൈകമാൻഡിന്​ കെ.പി.സി.സി കൈമാറി. മഹിളാ കോൺഗ്രസ്​ സംസ്ഥാന പ്രസിഡന്‍റ്​ ജെബി മേത്തർ, കെ.പി.സി.സി നിർവാഹകസമിതിയംഗം എം. ലിജു, യു.ഡി.എഫ്​ കൺവീനർ എം.എം ഹസൻ എന്നിവരുടെ പേരുകളാണ്​ പട്ടികയിൽ ഇടംപിടിച്ചതെന്ന്​ അറിയുന്നു.

ഈ പാനലിൽ നിന്നോ​ അല്ലെങ്കിൽ പുറത്ത്നിന്ന്​ മറ്റൊരാളെയോ സ്ഥാനാർഥിയായി ഹൈകമാൻഡ്​ തീരുമാനിച്ച്​ ഔദ്യോഗികമായി ​പ്രഖ്യാപിക്കും. പ്രഖ്യാപനം മിക്കവാറും ഇന്ന്​തന്നെ ഉണ്ടാകുമെന്ന്​ അറിയുന്നു.

ദിവസങ്ങൾ നീണ്ട അനിശ്​ചിതത്വത്തിനും ആശയക്കുഴപ്പത്തിനും ഒടുവിലാണ്​ കേരളത്തില്‍ നിന്ന്​ കോണ്‍ഗ്രസിന് വിജയസാധ്യതയുള്ള ഏക രാജ്യസഭാ സീറ്റിലേക്ക്​ പാനൽ തയാറായത്​. കഴിഞ്ഞ നിയമസഭാ തെരഞ്ഞെടുപ്പിൽ മൽസരിച്ച്​ തോറ്റവരെ പരിഗണിക്കേണ്ടെന്ന ആവശ്യം ഉയർന്നെങ്കിലും സ്വീകരിക്ക​പ്പെട്ടില്ല. യുവത്വം മാത്രമാണ്​ സ്ഥാനാർഥിത്വത്തിന്​ മാനദണ്ഡമാകേണ്ടതെന്ന വാദവും പാനൽ തയാറാക്കുന്നതിൽ​ പരിഗണിച്ചില്ല. അതേസമയം ഈ ആവശ്യങ്ങളും മാനിക്കപ്പെടുംവിധമാണ്​ പാനലിന്​ സംസ്ഥാന നേതൃത്വം രൂപം കൊടുത്തത്.

രാജ്യസഭയിൽ എ.കെ ആന്‍റണിയുടെ കാലാവധി പൂർതതിയാകുന്ന ഒഴിവിലേക്ക്​ പരിഗണിക്കപ്പെട്ട മൂന്ന്​ പേരിൽ രണ്ട്​ പേർ എ ഗ്രൂപ്പിൽ നിന്നുള്ളവരും ഒരാൾ കെ. സുധാകരന്‍റെ വിശ്വസ്തനുമാണ്​. എ.ഐ.സി.സി സെക്രട്ടറി ശ്രീനിവാസൻ കൃഷ്ണനെ പരിഗണിക്കണമെന്ന ഹൈകമാൻഡ്​ നിർദ്ദേശത്തോട്​ തുടക്കംമുതൽ സംസ്ഥാന നേതാക്കൾക്ക്​ യോജിപ്പില്ലായിരുന്നു. അതിനാൽത്തന്നെ അദ്ദേഹത്തെ പാനലിൽ ഉൾപ്പെടുത്താനും കെ.പി.സി.സി തയാറായില്ല. ഇത്​ സംസ്ഥാന നേതൃത്വത്തിന്‍റെ അസാധാരണ തീരുമാനമാണ്​.

കെ.പി.സി.സി പ്രസിഡന്‍റ്​ കെ.സുധാകരനും പ്രതിപക്ഷനേതാവ്​ വി.ഡി സതീശനും വ്യാഴാഴ്ചരാത്രി അതീവ രഹസ്യമായി നടത്തിയ കൂടിക്കാഴ്ചയോടെയാണ്​ രാജ്യസഭാ സ്ഥാനാർഥിയെ സംബന്​ധിച്ച്​ പാർട്ടിയിൽ ഉടലെടുത്ത അനിശ്​ചിതത്വത്തിന്​ മാറ്റംവന്നത്​. വ്യാഴാഴ്ച രാത്രി എട്ടുമണിയോടെ ഡൽഹിയിൽ നിന്ന്​ തലസ്ഥാനത്ത്​ മടങ്ങിയെത്തിയ കെ.പി.സി.സി പ്രസിഡന്‍റ്​ കെ. സുധാകരൻ വിമാനത്താവളത്തിൽ നിന്ന്​ നേരെ പ്രതിപക്ഷനേതാവ്​ വി.ഡി സതീശനെ അദ്ദേഹത്തിന്‍റെ ഔദ്യോഗിക വസതിയായ കന്‍റോൺമെന്‍റ്​ ഹൗസിലെത്തി കൂടിക്കാഴ്ച നടത്തുകയായിരുന്നു. മൂന്ന്​ മണിക്കൂറിലേറെ നീണ്ട കൂടിക്കാഴ്ചയിലാണ്​ മൂന്നംഗ പാനൽ സമർപ്പിക്കാൻ ധാരണയായത്​.

പാനലിൽ ഉൾപ്പെടുത്തേണ്ട പേരുകൾ സംബന്​ധിച്ചും ഇവർക്കിടയിൽ ധാരണയായതിന്​ പിന്നാലെ പാർട്ടിയിലെ മറ്റ്​ മുതിർന്ന നേതാക്കളുമായും നേതാക്കൾ അനൗപചാരിക ചർച്ചകൾ നടത്തി. തുടർന്നാണ്​ ജെബി മേത്തർ, എം.ലിജു, എം.എം ഹസൻ എന്നിവരുടെ പാനൽ തയാറാക്കി വെളളിയാ​ഴ്ച രാവിലെ ഹൈകമാൻഡിന്​ സമർപ്പിച്ചത്​. ഇവരിൽ ഹസനും ജെബിയും കഴിഞ്ഞ നിയമസഭാ തെരഞ്ഞെടുപ്പിൽ മൽസരിച്ചിരുന്നില്ല.

സമീപകാലംവരെ യൂത്ത്​കോൺഗ്രസ്​ ദേശീയ കോർഡിനേറ്ററായിരുന്ന ജെബി അടുത്തിടെയാണ്​ മഹിളാകോൺഗ്രസ്​ സംസ്​ഥാന അധ്യക്ഷയായത്​. സംസ്ഥാനത്ത്​ പാർട്ടിയുടെ മുതിർന്ന നേതാവായ ഹസൻ ഇപ്പോൾ യു.ഡി.എഫ്​ കൺവീനറാണ്​. കെ.പി.സി.സി ജന. സെക്രട്ടറിയും ആലപ്പുഴ ഡി.സി.സി ​പ്രസിഡന്‍റുമായിരുന്ന ലിജു പാർട്ടിയിൽ പുതുതലമുറയിലെ പ്രമുഖനാണ്​.

ഈ പാനലിൽ നിന്നോ​ അല്ലെങ്കിൽ പുറത്ത്നിന്ന്​ മറ്റൊരാളെയോ ഇനി സ്ഥാനാർഥിയായി ​പ്രഖ്യാപിക്കേണ്ടത്​ ഹൈകമാൻഡ്​ ആണ്​. സാധാരണ ഈ പാനലിൽ നിന്ന്​ ഒരാളെയാണ്​ തീരുമാനിക്കുകയെങ്കിലും ശ്രീനിവാസൻ കൃഷ്ണൻ ഉൾപ്പെടെ പാനലിൽ ഇല്ലാത്ത ആരുടെ പേരും ഹൈകമാൻഡിന്​ നേരിട്ട്​ പരിഗണിക്കാൻ സാധിക്കും.​ അതിന്​ ഹൈകമാൻഡ്​ മുതിരുമോയെന്നാണ്​ ഇനി അറിയേണ്ടത്​. ജെബി മേത്തറുടെ പേര്​ അംഗീകരിക്കപ്പെട്ടാൽ കേരളത്തിൽ​ നിന്ന്​ ഇതാദ്യമായിട്ടാകും ഒരു മുസ്​ലിം വനിത രാജ്യസഭയിൽ എത്തുക.