രാജ്യസഭാ തെരഞ്ഞെടുപ്പ്​: കരീമും ബിനോയിയും ജോസും പത്രികകൾ നൽകി

തിരുവനന്തപുരം: രാജ്യസഭയിലേക്ക്​ വരുന്ന ഒഴിവുകളിലേക്ക്​ സി.പി.എമ്മിലെ എളമരം കരീം, സി.പി.െഎയിലെ ബിനോയ്​ വിശ്വം, കേരള കോൺഗ്രസ്​-എമ്മിലെ ജോസ്​ കെ. മാണി എന്നിവർ നാമനിർദേശപത്രികകൾ നൽകി. കോൺഗ്രസിലെ പ്രഫ. പി.ജെ. കുര്യൻ, കേരള കോൺഗ്രസ്​-എമ്മിലെ ജോയ്​ എബ്രഹാം, സി.പി.എമ്മിലെ സി.പി. നാരായണൻ എന്നിവരുടെ കാലാവധി അവസാനിക്കുന്നതിനെ തുടർന്നാണ്​ തെരഞ്ഞെടുപ്പ്​.

നിയമസഭാ സെക്രട്ടറി മുമ്പാകെയാണ്​ പത്രികകൾ സമർപ്പിച്ചത്​. മുഖ്യമന്ത്രി പിണറായി വിജയൻ, സി.പി.​െഎ സംസ്​ഥാന സെക്രട്ടറി കാനം രാജേന്ദ്രൻ, അസി.സെക്രട്ടറി പ്രകാശ്​ ബാബു, ഇടതുമുന്നണി കൺവീനർ എ. വിജയരാഘവൻ, മന്ത്രിമാർ, എം.എൽ.എമാരായ തോമസ്​ ചാണ്ടി, കോവൂർ കുഞ്ഞുമോൻ, കെ.ബി. ഗണേഷ്​​കുമാർ എന്നിവർക്കൊപ്പം എത്തിയാണ്​ എളമരം കരീമും ബിനോയ്​ വിശ്വവും പത്രികകൾ നൽകിയത്​.

രണ്ട്​ സെറ്റ്​ വീതം പത്രികകളാണ്​ നൽകിയത്​. പ്രതിപക്ഷനേതാവ്​ രമേശ്​ ചെന്നിത്തല, മുൻമുഖ്യമന്ത്രി ഉമ്മൻ ചാണ്ടി, ഡോ.എം.കെ. മുനീർ, പി.ജെ. ജോസഫ്​, കെ.സി. ജോസഫ്​, അനൂപ്​ ജേക്കബ്​​, വി.കെ. ഇബ്രാഹിംകുഞ്ഞ്​, സി.എഫ്​. തോമസ്​, മോൻസ്​ ജോസഫ്​, അൻവർ സാദത്ത്​ തുടങ്ങിയർക്കൊപ്പം എത്തിയാണ്​ ജോസ്​ കെ. മാണി പത്രിക സമർപ്പിച്ചത്​. ഇതേസമയം, കെ. മുരളീധരൻ, വി.ഡി. സതീശൻ എന്നിവർ പത്രികസമർപ്പണചടങ്ങിൽ സംബന്ധിച്ചില്ല.

തിങ്കളാഴ്​ചയായിരുന്നു പത്രികൾ സമർപ്പിക്കാനുള്ള അവസാനദിവസം. തമിഴ്​നാട്​ സേലം സ്വദേശി കെ. പത്​മരാജൻ പത്രിക നൽകിയിട്ടുണ്ടെങ്കിലും നാമനിർദേശകരില്ല. അതിനാൽ, മറ്റ്​ മൂന്ന്​ പേരും എതിരില്ലാതെ തെരഞ്ഞെടുക്കപ്പെടും. പത്രികകളുടെ സൂഷ്​മപരിശോധന ചൊവ്വാഴ്​ച നടക്കും.