കസ്റ്റഡി മരണം: പൊലീസ്​ കംപ്ലയിന്‍റ് അതോറിറ്റി പരിശോധന നടത്തി

നെടുങ്കണ്ടം​: കസ്​റ്റഡി മർദനം നടന്ന നെടുങ്കണ്ടം പൊലീസ് സ്‌റ്റേഷനിൽ സ്‌റ്റേറ്റ് പൊലീസ് കംപ്ലയിൻറ്​ അതോറിറ്റ ി ചെയർമാൻ ജസ്​റ്റിസ് വി.കെ. മോഹന​​െൻറ നേതൃത്വത്തിൽ അംഗങ്ങളായ റിട്ട. ഡി.ജി.പി കെ.പി. സോമരാജൻ, റിട്ട. ജില്ല ജഡ്ജി ബാല സുബ്രഹ്മണ്യവും നേരിട്ടെത്തി തെളിവെടുപ്പ്​ നടത്തി. തട്ടിപ്പുകേസ് പ്രതി വാഗമൺ കോലാഹലമേട് കസ്തൂരിഭവനിൽ രാജ്​കുമാറിന്​ അനധികൃത കസ്​റ്റഡിൽ മർദനമേറ്റ നെടുങ്കണ്ടം പൊലീസ് സ്‌റ്റേഷൻ ലോക്കപ്പ്, മർദനം നടന്ന വിശ്രമമുറി എന്നിവിടങ്ങളിൽ സംഘം പരിശോധന നടത്തി.

മുണ്ടിയെരുമ സ്വദേശി ഹക്കീമിനു മർദനമേറ്റ ലോക്കപ്പ് മുറിയുടെ ഗ്രില്ലും സംഘം പരിശോധിച്ചു. സ്​റ്റേഷനിലെ ക്രൈം റെക്കോഡ് ട്രാക്കിങ് സിസ്​റ്റവും പരിശോധിച്ചു. പീരുമേട് സബ് ജയിലിൽ റിമാൻഡിലിരിക്കേ മരിച്ച രാജ്​കുമാറി​​െൻറ മരണത്തെ സംബന്ധിച്ച് നെടുങ്കണ്ടം പൊലീസിനെതിരെയും ഇടുക്കി എസ്.പിക്കെതിരെയും പി.ടി. തോമസ് എം.എൽ.എ നൽകിയ പരാതിയിൻമേൽ പ്രാഥമിക അന്വേഷണം നടത്തുന്നതിനു​ വേണ്ടിയാണ് സംഘമെത്തിയത്.

കോടതിയിൽ നടക്കുന്ന നടപടിക്രമങ്ങൾ പോലെ തന്നെയാണ് പൊലീസ് കംപ്ലയിൻറ്​ അതോറിറ്റിയുടെ പ്രവർത്തനമെന്നും ബുധനാഴ്ച ലഭിച്ച പരാതിയുടെ അടിസ്ഥാനത്തിലാണ് തെളിവെടുപ്പിന്​ എത്തിയതെന്നും സംഭവത്തിൽ പൊലീസുകാരുടെ പങ്കിനെപ്പറ്റിയും എസ്​.പിയുടെ പങ്കിനെപ്പറ്റിയും അന്വേഷിക്കുമെന്നും കുറ്റക്കാരനെന്ന്​ കണ്ടെത്തിയാൽ ഇവർക്കെതിരെ വകുപ്പുതല നടപടിക്കും നിയമവിധേയമായ ശിക്ഷാനടപടിക്കും ശിപാർശ ചെയ്യുമെന്നും ജസ്​റ്റിസ് വി.കെ. മോഹനൻ പറഞ്ഞു.

പരാതിക്കാരൻ തുടർനടപടിക്ക് സഹകരിക്കുന്ന മുറക്കു നടപടി സ്വീകരിക്കും ^ചെയർമാൻ പറഞ്ഞു. പീരുമേട് സബ് ജയിലിലും തെളിവെടുപ്പ്​ നടത്തിയതിനുശേഷം കുട്ടിക്കാനത്ത് ആദ്യ സിറ്റിങ്ങും നടത്തിയാണ്​ സംഘം മടങ്ങിയത്​.