പുനഃസംഘടനയിൽ ഗ്രൂപ്പ്​ മാനദണ്ഡമാകരുതെന്ന്​ രാഹുൽ ഗാന്ധി

കോഴിക്കോട്​: കോൺഗ്രസ്​ പുനഃസംഘടനയിൽ ഗ്രൂപ്പ്​ മാനദണ്ഡമാകരുതെന്ന്​ രാഹുൽ ഗാന്ധി. കോഴിക്കോട്​, മലപ്പുറം, വയനാട്​ ജില്ലകളി​െല കോൺഗ്രസ്​ നേതാക്കളുമായി നടത്തിയ കൂടിക്കാഴ്ചയിലാണ്​ രാഹുലിന്‍റെ പരാമർശം. ഡി.സി.സി, ബ്ലോക്ക്​ പുനഃസംഘടനയിൽ കഴിവാകണം മാനദണ്ഡമെന്നും രാഹുൽ ഗാന്ധി പറഞ്ഞു. കോൺഗ്രസിൽ ഗ്രൂപ്പ്​ പാടില്ലെന്നും അദ്ദേഹം നിർദേശിച്ചു.

പുനഃസംഘടനക്ക്​ മുമ്പ്​ മുതിർന്ന നേതാക്കളുടെ അഭിപ്രായം തേടണം. ഭാരവാഹികളെ നിയമിക്കുന്നതിൽ നേതാക്കളുടെ ക്വാട്ട പാടില്ല. സെമികേഡർ സംവിധാനത്തിലേക്ക്​ ​മാറുന്നത്​ നല്ലതാണെന്ന്​ രാഹുൽ ഗാന്ധി അഭിപ്രായപ്പെട്ടു. വി.എം.സുധീരനെ പോലുള്ള കോൺഗ്രസിലെ മുതിർന്ന നേതാക്കാൾ കെ.പി.സി.സി നേതൃത്വത്തിനെതിരെ രംഗത്ത്​ വരുന്ന സാഹചര്യത്തിലാണ്​ രാഹുലിന്‍റെ പരാമർശമെന്നത്​ ശ്രദ്ധേയമാണ്​.

നേരത്തെ വി.എം.സുധീരൻ രാഷ്​ട്രീയകാര്യ സമിതിയിൽ നിന്നും എ.ഐ.സി.സിയിൽ നിന്നും രാജിവെച്ചിരുന്നു. പുതിയ നേതൃത്വത്തോടുള്ള അതൃപ്​തിയെ തുടർന്നായിരുന്നു രാജി. മുല്ലപ്പള്ളി രാമചന്ദ്രൻ, ഉമ്മൻചാണ്ടി, രമേശ്​ ചെന്നിത്തല എന്നിവരും പുതിയ കോൺഗ്രസ്​ നേതൃത്വത്തിന്‍റെ പ്രവർത്തനങ്ങളിലുള്ള അതൃപ്​തി മറച്ചുവെച്ചിരുന്നില്ല.