വനിത അംഗങ്ങൾക്ക്​ നേരെ സഭയിൽ ആക്രമണമുണ്ടാവുന്നത്​ ചരിത്രത്തിലാദ്യമെന്ന്​ രാഹുൽ ഗാന്ധി; പ്രതിഷേധവുമായി പ്രതിപക്ഷം

ന്യൂഡൽഹി: പെഗസസ്​, കാർഷിക നിയമങ്ങളുമായി ബന്ധപ്പെട്ട്​ വലിയ പ്രതിഷേധം സംഘടിപ്പിച്ച്​ പ്രതിപക്ഷ പാർട്ടികൾ. പ്രതിഷേധവുമായി പ്രതിപക്ഷ പാർട്ടി അംഗങ്ങൾ വിജയ്​ ചൗക്കിലേക്ക്​ മാർച്ച്​ നടത്തി. കോൺഗ്രസ്​, ശിവസേന തുടങ്ങി പ്രമുഖ പ്രതിപക്ഷ പാർട്ടികളിലെ അംഗങ്ങളെല്ലാം മാർച്ചിൽ പ​ങ്കെടുത്തു​.

കർഷക നിയമങ്ങൾ പിൻവലിക്കണമെന്ന്​ ആവശ്യപ്പെടുന്ന ബാനറുകളുമായാണ്​ പ്രതിപക്ഷ പ്രതിഷേധം. പെഗസസ്​, പണപ്പെരുപ്പം, കർഷക പ്രശ്​നം എന്നിവ പാർലമെന്‍റിൽ ഉയർത്തിയിരുന്നു. എന്നാൽ, ഞങ്ങൾക്ക്​ സംസാരിക്കാൻ അവസരം ലഭിച്ചില്ല അതിനാലാണ്​ ഇവിടെ വന്നതെന്ന്​ കോൺഗ്രസ്​ നേതാവ്​ രാഹുൽ ഗാന്ധി പറഞ്ഞു. പാർലമെന്‍റിന്‍റെ ചരിത്രത്തിൽ ഇതാദ്യമായാണ്​ വനിത അംഗങ്ങൾക്കെതിരെ ആക്രമണം നടക്കുന്നത്​. സഭ നിയന്ത്രിക്കുകയാണ്​ അധ്യക്ഷന്‍റെ ചുമതലയെന്നും രാഹുൽ ചൂണ്ടിക്കാട്ടി.

പ്രതിപക്ഷത്തിന്​ തങ്ങളുടെ ഭാഗം വിശദീകരിക്കാൻ പാർലമെന്‍റിൽ അവസരം ലഭിച്ചില്ല. കഴിഞ്ഞ ദിവസം സ്​ത്രീ അംഗങ്ങൾക്കെതിരെയുണ്ടായ മോശം പെരുമാറ്റം ജനാധിപത്യത്തിന്​ എതിരാണ്​. പാകിസ്​താൻ അതിർത്തിയിലാണ്​ നിൽക്കുന്ന തോന്നലാണ്​ തനിക്കുണ്ടാവുന്നതെന്ന്​ ശിവസേന എം.പി സഞ്​ജയ്​ റാവത്ത്​ പ്രതികരിച്ചു.

അതേസമയം, രാജ്യസഭ ഉപാധ്യക്ഷൻ വെങ്കയ്യ നായിഡുവുമായി പ്രതിപക്ഷ എം.പിമാർ കൂടിക്കാഴ്ച നടത്തുമെന്ന റിപ്പോർട്ടുകളും പുറത്ത്​ വരുന്നുണ്ട്​. കാർഷിക നിയമങ്ങൾ പിൻവലിക്കണമെന്ന്​ ആവശ്യപ്പെട്ടാവും എം.പിമാർ വെങ്കയ്യ നായിഡുവുമായി കൂടിക്കാഴ്ച നടത്തുക.