ലോക്ഡൗൺ സമയത്ത് കൂടുതൽ സഹായമെത്തിച്ച 10 എം.പിമാരിലൊരാളായി രാഹുൽ ഗാന്ധി

ന്യൂഡൽഹി: കോവിഡ് ലോക്ഡൗണ്‍ കാലയളവില്‍ സ്വന്തം മണ്ഡലത്തിലെ ജനങ്ങള്‍ക്ക് കൂടുതല്‍ സഹായം എത്തിച്ച 10 എം.പിമാരുടെ പട്ടികയില്‍ മുൻ പാർട്ടി അധ്യക്ഷനും വയനാട് എം.പിയുമായ രാഹുല്‍ ഗാന്ധിയും. ഡല്‍ഹി കേന്ദ്രീകരിച്ച് പ്രവര്‍ത്തിക്കുന്ന ഗവേണ്‍ ഐ സിസ്റ്റംസ് എന്ന പൗരാഭിപ്രായ ശേഖരണ സ്ഥാപനമാണ് സര്‍വെ നടത്തിയത്.

512 എം.പിമാരിൽ നിന്നും 33,82,560 നോമിനേഷനുകളാണ് ലഭിച്ചത്. ജനങ്ങളുടെ അഭിപ്രായത്തിനനുസരിച്ച് 25 ലോക്സഭാ എം.പിമാരെ ആദ്യം തെരഞ്ഞെടുക്കുകയും അതില്‍ നിന്നും 10 മികച്ച എം.പിമാരെ ഷോട്ട് ലിസ്റ്റ് ചെയ്യുകയായിരുന്നു. ലോക്ഡൗണ്‍ വേളയില്‍ സ്വന്തം മണ്ഡലങ്ങളില്‍ എം.പിമാരുടെ പ്രവര്‍ത്തനം വിലയിരുത്തി നടത്തിയ സര്‍വെയിലാണ് ഇക്കാര്യം വ്യക്തമാക്കുന്നത്. ഒക്ടോബർ ഒന്നിനാണ് സർവേ ആരംഭിച്ചത്.

പ്രഭാകര റെഡ്ഢി, മഹുവ മൊയ്ത്ര, തേജസ്വി സൂര്യ, ഹേമന്ത് തുക്കറാം, സുഖ്ബീർ സിങ് ബാദൽ, ശങ്കർ ലാൽവാനി, ഡോ. ടി. സുമതി, തമിഴാച്ചി തങ്കപാണ്ഡ്യൻ, നിതിൻ ജയ്റാം ഗഡ്കരി എന്നിവരാണ് തെരഞ്ഞെടുക്കപ്പെട്ട മറ്റ് എം.പിമാർ.