തുടർഭരണം പ്രവചിച്ചും മകന്‍റെ വിജയം അറിഞ്ഞും മടക്കം

കൊല്ലം: തന്‍റെ പാർട്ടി കൂടി ഉൾപ്പെട്ട ഇടതുമുന്നണി പിണറായി വിജയന്‍റെ നേതൃത്വത്തിൽ തുടർഭരണത്തിലെത്തുമെന്ന്​ പ്രവചിച്ചും മകൻ ഗണേഷ്​ കുമാറിന്‍റെ പത്തനാപുരം മണ്ഡലത്തിലെ വിജയം കണ്ടുമായിരുന്നു കേരള രാഷ്​ട്രീയത്തിലെ മഹാമേരുവായിരുന്ന ബാലകൃഷ്​ണപിള്ളയുടെ മടക്കയാത്ര. ഗണേഷ്​ കുമാറിന്‍റെ പത്തനാപുരം മണ്ഡലത്തിലെ തെരഞ്ഞെടുപ്പ്​ കമ്മിറ്റി ഓഫിസ്​ ഉദ്​ഘാടനം ചെയ്യാനെത്തിയപ്പോൾ മാധ്യമപ്രവർത്തകരോട്​ സംസാരിക്കവേയാണ്​ ബാലകൃഷ്​ണപിള്ള ഇടതുമുന്നണിയുടെ തുടർഭരണം പ്രവചിച്ചത്. തുടർഭരണം ഉണ്ടാകുമോ​െയന്ന മാധ്യമപ്രവർത്തകരുടെ ചോദ്യത്തിന്​ 'യാതൊരു സംശയവുമില്ല' എന്നായിരുന്നു ബാലകൃഷ്​ണപിള്ളയുടെ മറുപടി. താൻ പ്രവചിച്ചതുപോലെ ഇടതുമുന്നണി ചരിത്ര വിജയം നേടിയതും പത്തനാപുരത്ത്​ ഗണേഷ്​കുമാർ ജയിച്ചുകയറിയതും അറിഞ്ഞ ശേഷമാണ്​ കാലം അദ്ദേഹത്തെ തിരിച്ചുവിളിച്ചത്​.

അരനൂറ്റാണ്ടായ കേരളത്തിൽ നടന്ന തെരഞ്ഞെടുപ്പുകളിലെല്ലാം പ്രത്യക്ഷമായും പരോക്ഷമായും സാന്നിധ്യമറിയിച്ചിട്ടുള്ള ബാലകൃഷ്​ണപിള്ള അവസാന നാളുകളിലും ആ പതിവ്​ തെറ്റിച്ചില്ല. രോഗകിടക്കയിലും രാഷ്​ട്രീയം തന്നെയായിരുന്നു അദ്ദേഹത്തിന്‍റെ ജീവവായു. ഇടതുമുന്നണിയുടെ പത്തനാപുരം മണ്ഡലത്തിലെ തെരഞ്ഞെടുപ്പ്​ കമ്മിറ്റി ഓഫിസ്​ ഉദ്​ഘാടനം ചെയ്യാനും ഒരു ദിവസം ഗണേഷ്​കുമാറിനുവേണ്ടി പ്രചാരണത്തിന്​ ഇറങ്ങാനും അദ്ദേഹമെത്തിയത്​ അണികളിൽ ഏ​െറ ആവേശമാണ്​ സൃഷ്​ടിച്ചത്​. ബാലകൃഷ്​ണപിള്ള അവസാനമായി പ​ങ്കെടുത്ത പൊതുപരിപാടിയും ഇതായിരുന്നു.

ശ്വസനസംബന്ധമായ പ്രശ്​നങ്ങൾ ഉള്ളതിനാൽ കഴിഞ്ഞ ഒന്നരവർഷമായി കൊട്ടാരക്കരയ​ിലെ വീട്ടിൽ തിരക്കുകളിൽ നിന്നകന്ന്​ ജീവിക്കുകയായിരുന്നെങ്കിലും പാർട്ടി നേതാക്കൾക്കുവേണ്ടിയുള്ള കൃത്യമായ നയങ്ങളും ഉപദേശങ്ങളും നൽകിയിരുന്നത്​ ബാലകൃഷ്​ണപിള്ള തന്നെയാണ്​. തദ്ദേശ സ്വയംഭരണ തെരഞ്ഞെടുപ്പിലും ഇപ്പോൾ ഒടുവിൽ ഗണേഷ്​കുമാറിന്‍റെ തെരഞ്ഞെടുപ്പ്​ പ്രചാരണത്തിലും പാർട്ടി നീങ്ങിയത്​ അദ്ദേഹത്തിന്‍റെ വാക്കുകൾ അനുസരിച്ച്​ തന്നെയാണ്​. ഉദ്യോഗസ്​ഥർ വീട്ടിലെത്തിയാണ്​ അദ്ദേഹത്തിന്‍റെ വോട്ട്​ രേഖപ്പെടുത്തിയത്​.