അൻവറിന്‍റെ യാത്ര യു.ഡി.എഫിന്‍റെ തിരക്കഥക്കനുസരിച്ച്​ -എ. വിജയരാഘവൻ

തൃശൂർ: യു.ഡി.എഫ്‌ തയാറാക്കിയ തിരക്കഥക്കനുസരിച്ചാണ്​ പി.വി. അൻവർ യാത്ര ചെയ്യുന്നതെന്ന്‌ സി.പി.എം പൊളിറ്റ്‌ ബ്യൂറോ അംഗം എ. വിജയരാഘവൻ. മുമ്പ്​ അൻവർ വാർത്തകളുണ്ടാക്കി മാധ്യമ ശ്രദ്ധനേടാൻ സി.പി.എമ്മിനെയും മുഖ്യമന്ത്രി പിണറായി വിജയനെയും കടന്നാക്രമിച്ചിരുന്നു. ഇതെല്ലാം യു.ഡി.എഫുമായുള്ള വ്യക്തമായ ധാരണയുടെ അടിസ്ഥാനത്തിൽ ആയിരുന്നുവെന്ന്​ വിജയരാഘവൻ തൃശൂരിൽ മാധ്യമ പ്രവർത്തകരോട്‌ പറഞ്ഞു.

അൻവറിന്‍റെ സമര പരിപാടി മുസ്​ലിം ലീഗ്‌ നേതാവ്‌ ഇ.ടി. മുഹമദ്‌ ബഷീറാണ്‌ ഉദ്‌ഘാടനം ചെയ്‌തത്‌. കെ.പി.സി.സി പ്രസിഡന്‍റ്​ കെ. സുധാകരനും പ്രതിപക്ഷ നേതാവ്‌ വി.ഡി. സതീശനും രമേശ്‌ ചെന്നിത്തലയും അൻവർ പറയുന്നതിന്‍റെ അനുബന്ധം പറയുന്നവരായി മാറി. കേരളത്തെ വർഗീയമായി ചേരിതിരിരിക്കുക, ആ വർഗീയചേരിയെ യു.ഡി.എഫിന്‌ പിന്നിൽ അണിനിരത്തുക എന്നതാണ്‌ ലക്ഷ്യം. കേരളത്തിലെ ഇടതുപക്ഷത്തെ രാഷ്‌ട്രീയമായി പ്രതിരോധിക്കാൻ കഴിയാത്തതിനാൽ എല്ലാ വിഷയവും വർഗീയവൽക്കരിക്കുകയും സാമുദായികവൽക്കരിക്കുകയും ചെയ്യുകയാണ്​. വന്യജീവി സംഘർഷം പാരിസ്ഥിതിക പ്രശ്‌നങ്ങളുടെ ഭാഗമാണ്‌. അത്‌ രാഷ്‌ട്രീയ വിഷയമല്ല. എന്നാൽ അത്‌ രാഷ്‌ട്രീയം മാത്രമല്ല, വർഗീയ വിഷയവുമാക്കുന്നു.

യു.ഡി.എഫിന്‌ പറയാൻ പറ്റാത്ത കാര്യങ്ങൾ അൻവറിനെക്കൊണ്ട്‌ പറയിപ്പിക്കുകയാണ്​. പറയുന്നതെല്ലാം പതിരാണ്‌. മുഖ്യമന്ത്രിയുടെ പ്രൈവറ്റ്‌ സെക്രട്ടറിക്കെതിരെ ആരോപണങ്ങൾ ആവർത്തിച്ചാൽ പ്രത്യേക പിന്തുണ കിട്ടുമെന്നത്‌ തെറ്റിധാരണയാണ്‌. രാഷ്‌ട്രീയ നേട്ടമുണ്ടാക്കാൻ യു.ഡി.എഫ്‌ എളുപ്പവഴി തേടുകയാണ്‌. ജനങ്ങൾ പുറംതള്ളുമെന്നതിനാലാണ്‌ വീണ്ടും മത്സരിക്കാനില്ലെന്ന്‌ അൻവർ പറയുന്നത്‌. ഇതൊന്നും ഇടത്​ മുന്നണിയുടെ ബഹുജന അടിത്തറ ഇല്ലാതാക്കാൻ പര്യാപ്‌തമല്ല. സാമുദായിക സൗഹാർദമുള്ള നാടാണ്‌ കേരളം. എൽ.ഡി.എഫിന്‌ സമഗ്ര വികസന കാഴ്ചപ്പാടാണ്‌. ഇടതുപക്ഷത്തെ മാറ്റി ഏറ്റവും പ്രതിലോമ ചേരിക്കൊപ്പം കേരളം നിൽക്കില്ലെന്നും എ. വിജയരാഘവൻ പറഞ്ഞു.