പുന്ന നൗഷാദ് വധം: തുമ്പില്ലാതെ മൂന്നാംദിനം ; പൊലീസിനെതിരെ കുടുംബം

ചാവക്കാട്: പുന്നയില്‍ കോണ്‍ഗ്രസ് പ്രവര്‍ത്തകന്‍ പുതുവീട്ടില്‍ നൗഷാദ് കൊല്ലപ്പെട്ട് മൂന്ന് ദിനം പിന്നിടുമ്പോള്‍ പൊലീസി​ന്​ പ്രതികളെക്കുറിച്ച് ഒരു സൂചനയും ലഭിച്ചില്ല. പ്രതികളെക്കുറിച്ചുള്ള വിവരങ്ങൾ ദൃക്​സാക്ഷികൾ പൊലീസിന്​ നൽകിയിട്ടും പൊലീസിന്​ മുന്നോട്ട്​ പോകാൻ കഴിഞ്ഞിട്ടില്ല എന്ന ആരോപണമുണ്ട്​. വൈകുന്നേരം ആറരയോടെ പുന്ന സ​​െൻററില്‍ ഏഴു ബൈക്കുകളിലായെത്തിയ അക്രമികൾ നൗഷാദിനെയും കൂട്ടുകാരെയും വെട്ടുന്നത് കണ്ടവര്‍ അതാരൊക്കെയാണെന്ന്​ കൃത്യമായി പൊലീസിന്​ വിവരം നല്‍കിയെന്നാണ്​ പറയുന്നത്​. അവർക്ക്​ വഴിയൊരുക്കി പുന്ന സ​​െൻററിൽ സംഭവ സമയത്ത് ഒരു യുവാവ് മൊബൈല്‍ ഫോണിൽ സംസാരിച്ച് നിന്നിരുന്ന​േത്ര.

ആക്രമണത്തിനു ശേഷം രക്ഷപ്പെടുന്നതിനിടെ തെന്നി വീണ ബൈക്ക് നേരയാക്കി കൊടുക്കാന്‍ ഈ യുവാവ് സഹായിച്ചുവെന്നതും നാട്ടില്‍ പാട്ടാണ്​. പ്രദേശത്തെ എസ്.ഡി.പി.ഐ പ്രവര്‍ത്തകനായ ഇയാളുടെ സാന്നിധ്യമാണ് സംഭവത്തില്‍ എസ്.ഡി.പി.ഐയുടെ പങ്കുണ്ടെന്നതി​​​െൻറ തെളിവായി കോൺഗ്രസ് നേതൃത്വം ചൂണ്ടിക്കാട്ടുന്നത്​.
കൃത്യത്തിന്​ ശേഷം രണ്ട് ബൈക്കുകൾ അതിവേഗത്തിൽ ഓടിച്ചു പോകുന്നത്​ സമീപത്തെ വീട്ടിലെ സി.സി.ടി.വിയിൽ നിന്ന്​ കിട്ടിയ ദൃശ്യം സമൂഹ മാധ്യമങ്ങളിൽ വൈറലാണ്. അക്രമികൾ കടന്നുപോയ വഴിയാണ് ഇത്​ വ്യക്തമാക്കുന്നത്. സഞ്ചാരികളുടെ മുഖവും ബൈക്കും അവ്യക്തമാണ്. അതേ സമയം അൽപമകലം ചില യുവാക്കളേയും കാണുന്നുണ്ട്.

ഇതിനിടെ സംഭവവുമായി ബന്ധപ്പെട്ട് വടക്കേക്കാട് പൊലീസ്​ കസ്​റ്റഡിയിൽ എടുത്ത മൂന്ന്​ പേരെയും ചാവക്കാട് പൊലീസ്​ കസ്​റ്റഡിയിൽ എടുത്ത ഒമ്പത് പേരെയും വിട്ടയച്ചു. വെള്ളിയാഴ്​ച രാവിലെ മുതൽ ചാവക്കാട് മേഖലയിൽ പൊലീസ് നെട്ടോട്ടത്തിലാണ്. പരിസര പ്രദേശങ്ങളിലെ എസ്.ഡി.പി.ഐ പ്രവർത്തകർ ആരാണെന്നും വീട് എവിടെയാണെന്നും ചോദിച്ചാണ് ഇവരുടെ പാച്ചിൽ. യഥാർഥ പ്രതികളുടെ അയലത്തു പോലും പൊലീസ് എത്തിയിട്ടില്ലെന്നാണ് ഇത് വ്യക്തമാക്കുന്നത്.

പൊലീസിനെതിരെ കുടുംബം
ചാവക്കാട്: കോണ്‍ഗ്രസ് ബൂത്ത് പ്രസിഡൻറ്​ പുന്നയിൽ നൗഷാദ്​ കൊലപാതകക്കേസിൽ പൊലീസിനെതിരെ രൂക്ഷ വിമർശനവുമായി നൗഷാദി​​െൻറ സഹോദരൻ. പൊലീസി​​െൻറ ഭാഗത്ത് വലിയ വീഴ്ച ഉണ്ടായെന്ന് സഹോദരൻ കമർ പറഞ്ഞു. വധഭീഷണി ഉണ്ടെന്ന് പലവട്ടം പരാതി​െപ്പട്ടിട്ടും പൊലീസ് നടപടി സ്വീകരിച്ചില്ല. അന്നേ നടപടി എടുത്തിരുന്നുവെങ്കിൽ നൗഷാദ് കൊല്ലപ്പെടില്ലായിരുന്നുവെന്നും കേസ്​ ഗൗരവത്തിൽ അന്വേഷിക്കുന്നില്ലെന്നും കമർ മാധ്യമപ്രവർത്തകരോട്​ പറഞ്ഞു. കഴിഞ്ഞ ചൊവ്വാഴ്ച വൈകീട്ട്​​ പുന്ന സ​​െൻററിൽ സുഹൃത്തുക്കളുമായി സംസാരിച്ചുനിൽക്കവെയാണ്​ നൗഷാദിനെയും മറ്റും മാരകായുധങ്ങളുമായെത്തിയ സംഘം ആക്രമിച്ചത്.