പി.എസ്​.സി പരീക്ഷാതട്ടിപ്പ്​: പ്രണവും സഫീറും റിമാൻഡിൽ

തിരുവനന്തപുരം: പി.എസ്‌.സി പരീക്ഷാതട്ടിപ്പ്​ കേസിൽ ഒളിവിലായിരുന്ന രണ്ട്​ പ്രതികൾ കൂടി കോടതിയിൽ കീഴടങ്ങി. മുഖ് യപ്രതികളായ പി​.പി. പ്രണവും കല്ലറ സ്വദേശി സഫീറുമാണ് തിരുവനന്തപുരം ചീഫ്​ ജുഡീഷ്യൽ മജിസ്​ട്രേറ്റ്​​ കോടതിയിൽ കീഴടങ്ങിയത്. പത്ത്​ ദിവസത്തിനുള്ളിൽ ഇവർ കീഴടങ്ങണമെന്ന്​ ഹൈകോടതിയുടെ നിർദേശമുണ്ടായിരുന്നു​. ഇരുവരെയും ഈമാസം 20 വരെ കോടതി റിമാൻഡ് ചെയ്‌തു. ഇതോടെ കേസിൽ ക്രൈംബ്രാഞ്ച്​ പ്രതിചേർത്ത അഞ്ചുപേരും കസ്​റ്റഡിയിലായി​.

അതിനിടെ റിമാൻഡിൽ കഴിയുന്ന ​ശിവരഞ്ജിത്ത്​, നസീം എന്നിവരെ നുണപരിശോധനക്ക്​ വിധേയമാക്കാനുള്ള അപേക്ഷ ക്രൈംബ്രാഞ്ച്​ കോടതിയിൽ സമർപ്പിച്ചു. ഇവർക്ക്​ വീണ്ടും പരീക്ഷ നടത്തണമെന്നും ​ൈക്രംബ്രാഞ്ച്​ ആവശ്യപ്പെട്ടിട്ടുണ്ട്​. ആ അപേക്ഷയിൽ ഇൗമാസം 20ന്​ കോടതി വിധിപറയും. പി.എസ്​.സി കോൺസ്​റ്റബിൾ പരീക്ഷാതട്ടിപ്പി​​െൻറ മുഖ്യസൂത്രധാരകൻ പ്രണവാണെന്നാണ്​ അന്വേഷണസംഘത്തി​​െൻറ വിലയിരുത്തൽ. നേരത്തേ അറസ്​റ്റിലായ മൂന്നുപേരും ഇൗ രീതിയിലാണ്​ മൊഴി നൽകിയത്​. യൂനിവേഴ്​സിറ്റി കോളജിലെ കത്തിക്കുത്ത്​ കേസിൽ 17ാം പ്രതിയുമാണ്​​ ഇയാൾ​.

പ്രണവിനെ ചോദ്യം ചെയ്യുന്നതോടെ തട്ടിപ്പി​​െൻറ സമ്പൂർണ വിവരങ്ങൾ പുറത്തുവരുമെന്ന പ്രതീക്ഷയിലാണ്​ അന്വേഷണസംഘം. പ്രണവിനെ നേരത്തേ പി.എസ്‍.സി വിജിലൻസും ചോദ്യം ചെയ്തിരുന്നു. ചോദ്യം ചെയ്​ത്​ വിട്ടയച്ചതിന് പിന്നാലെ ഇയാൾ ഒളിവില്‍ പോകുകയായിരുന്നു. അതിനിടെ, പി.എസ്‍.സി പരീക്ഷാതട്ടിപ്പ് സി.ബി.ഐ അന്വേഷിക്കണമെന്ന്​ ആവശ്യപ്പെട്ട് ഒരു സംഘം ഉദ്യോഗാർഥികൾ ഹൈകോടതിയിൽ ഹരജി നൽകി.