പി. സദാശിവത്തി​െൻറ പ്രവർത്തനത്തിൽ അതൃപ്തിയില്ല -പി.എസ്. ശ്രീധരൻപിള്ള

കോഴിക്കോട്: ലിംഗനീതിക്കായുള്ള പോരാട്ടത്തിന്​ മന്ത്രിസ്ഥാനം ഉൾപ്പെടെ വലിച്ചെറിഞ്ഞ ആരിഫ് മുഹമ്മദ് ഖാൻ തത്ത്വാധിഷ്ഠിത രാഷ്​ട്രീയത്തിൽ ഈ കാലഘട്ടത്തിലെ വലിയ പ്രതീകമാണെന്ന് ബി.ജെ.പി സംസ്ഥാന പ്രസിഡൻറ്​ അഡ്വ. പി.എസ്. ശ്രീധരൻപിള്ള. പുരോഗമന സ്വഭാവമുള്ള നവോത്ഥാന നായകനായ ഒരാൾ ഗവർണറായി വരുന്നതിൽ ബി.ജെ.പിയും കേരളജനതയും വലിയ പ്രതീക്ഷ അർപ്പിക്കുന്നുണ്ട്. നിലവിലെ ഗവർണർ പി. സദാശിവത്തി​​െൻറ പ്രവർത്തനത്തിൽ എതിർപ്പോ അതൃപ്തിയോ പാർട്ടിക്കില്ല.

പാലാ ഉപതെരഞ്ഞെടുപ്പിൽ ബി.ജെ.പിക്ക്​ വിജയപ്രതീക്ഷയുണ്ട്. സ്ഥാനാർഥി നിർണയ കമ്മിറ്റിയുടെ ശിപാർശ അംഗീകരിച്ച് സ്​ഥാനാർഥി പ്രഖ്യാപനം തിങ്കളാഴ്ച ഉച്ചക്കു ശേഷമുണ്ടാവുമെന്നാണ് പ്രതീക്ഷ. കെ.എം. മാണിയുടെ സഹോദരപുത്രൻ അഡ്വ. ജോൺസൺ തോമസ് ഉൾപ്പെടെയുള്ളവർ പാർട്ടി അംഗത്വമെടുത്തത് ശുഭസൂചനയാണ്. മെംബർഷിപ് കാമ്പയി​​െൻറ ഒന്നാം ഘട്ടം പൂർത്തിയായപ്പോൾ ബി.ജെ.പിയുടെ അംഗത്വ സംഖ്യ 15 ലക്ഷത്തിൽനിന്ന്​ 65 ശതമാനത്തോളം വർധിച്ച് 24 ലക്ഷമായി ഉയർന്നതായി ശ്രീധരൻ പിള്ള കൂട്ടിച്ചേർത്തു.