ഓൾ ഇന്ത്യ ടൂറിസ്റ്റ് വെഹിക്കിൾസ് റൂൾസിലെ പൊതുതാൽപര്യ വിരുദ്ധമായ വ്യവസ്ഥകൾ റദ്ദാക്കണം; ഹരജിയുമായി കെ.എസ്.ആർ.ടി.സി

കൊച്ചി: 2023 മേയ്​ ഒന്നിന്​ നിലവിൽവന്ന ഓൾ ഇന്ത്യ ടൂറിസ്റ്റ്​ വെഹിക്കിൾസ്​ (പെർമിറ്റ്​) റൂൾസിലെ പൊതുതാൽപര്യവിരുദ്ധമായ ചില വ്യവസ്ഥകൾ​ റദ്ദാക്കണമെന്നാവശ്യപ്പെട്ട്​ ഹൈകോടതിയിൽ കെ.എസ്.ആർ.ടി.സിയുടെ ഹരജി. ദേശസാത്​കൃത റൂട്ടുകളിലും ഷെഡ്യൂൾഡ്​ റൂട്ടുകളിലുമടക്കം സർവിസ്​ നടത്താനും യാത്രക്കാരെ കയറ്റിയിറക്കാനും ടൂറിസ്റ്റ്​ പെർമിറ്റ്​ വാഹനങ്ങൾക്ക്​ അനുമതി നൽകുന്ന വ്യവസ്ഥകൾ മോട്ടോർ വാഹന നിയമത്തിന്​ വിരുദ്ധമാണെന്നു​ ചൂണ്ടിക്കാട്ടിയാണ്​ ഹരജി.

പൊതുസേവന വാഹനങ്ങൾക്ക്​ കോൺട്രാക്ട്​ കാര്യേജ്​, സ്​റ്റേജ്​ കാര്യേജ്​ തുടങ്ങി രണ്ടു​ തരം പെർമിറ്റുകളാണ്​ മോട്ടോർ വാഹന നിയമപ്രകാരം നിലവിലുള്ളത്​. വ്യത്യസ്ത നിരക്ക്​ യാത്രക്കാരിൽനിന്ന്​ ഈടാക്കി ഓരോരുത്തരുടേതും ലക്ഷ്യങ്ങളിലെത്തിക്കുന്നതാണ്​ സ്​റ്റേജ്​ കാര്യേജ്​. സ്​ഥിരസേവനമാണ്​​ സ്​റ്റേജ്​ കാരിയർ വാഹനങ്ങളുടേത്​​. ഒരിടത്തുനിന്ന്​ മറ്റൊരിടത്തേക്കുള്ള ദൂരത്തിനനുസരിച്ച്​ അവസാന പോയന്‍റ്​ വരെ നിരക്ക്​ നിശ്ചയിച്ചിട്ടുള്ളതാണ്​ ഇവ. ഒരു പോയന്‍റിൽനിന്ന്​ അടുത്ത പോയന്‍റിലേക്ക്​ നിരക്ക്​ മാറും. അതേസമയം, ആളുകൾ ഇടക്ക്​ കയറുന്നതോ ഇറങ്ങുന്നതോ യാത്രക്കാരുടെ എണ്ണമോ ദൂരമോ ബാധകമല്ലാതെ ഒരിടത്തുനിന്ന്​ മറ്റൊരിടത്തേക്ക്​ കരാർ അടിസ്ഥാനത്തിൽ യാത്രക്കാരെ എത്തിക്കുന്നവയാണ്​ കോ​ൺട്രാക്ട്​ കാര്യേജ്​ വാഹനങ്ങൾ.

എന്നാൽ, ഓൾ ഇന്ത്യ ടൂറിസ്റ്റ്​ വെഹിക്കിൾസ്​ (പെർമിറ്റ്​) റൂൾസ്​ നിലവിൽവന്നതോ​ടെ കോൺട്രാക്ട്​ കാര്യേജ്​ വാഹനങ്ങൾ ടൂറിസ്റ്റ്​ പെർമിറ്റ്​ തരപ്പെടുത്തി സ്​റ്റേജ്​ കാര്യേജ്​ ബസുകളെ പോലെ ഓടുന്നതായി ഹരജിയിൽ ആരോപിക്കുന്നു. ഇത്തരം ബസുകൾ സ്​റ്റേജ്​ കാര്യേജ്​ പോലെ സ്ഥിരം പ്രത്യേക റൂട്ടിലൂടെ ഓടി ആളെ കയറ്റുന്നു. ദേശസാത്​കൃത, ഷെഡ്യൂൾഡ്​ റൂട്ടുകളിലും ഇവ സർവിസ്​ നടത്തുന്നു. സാമൂഹിക മാധ്യമങ്ങളിലൂടെ ഇത്​ പരസ്യപ്പെടുത്തുന്നുമുണ്ട്​. സർക്കാർ നിശ്ചയിക്കുന്ന നിരക്കോ ​അംഗീകൃത സമയക്രമമോ ഷെഡ്യൂളോ ഇല്ലാതെ സ്​റ്റേജ്​ കാരിയറായി ഇങ്ങനെ ഓടിക്കുന്നത്​ മോട്ടോർ വാഹന നിയമത്തിലെ വ്യവസ്ഥകൾക്ക്​ വിരുദ്ധമാണെന്ന് ആരോപിച്ചാണ് കെ.എസ്.ആർ.ടി.സിയുടെ ഹരജി.