വിമാനത്തിലെ പ്രതിഷേധം: പറഞ്ഞത്​ മാറ്റിപ്പറഞ്ഞ്​ കോടിയേരി

തിരുവനന്തപുരം: മുഖ്യമന്ത്രി പിണറായി വിജയനെതിരെ വിമാനത്തിൽ നടന്ന പ്രതിഷേധത്തിൽ മുൻ നിലപാടിൽ മലക്കം മറിഞ്ഞ്​ സി.പി.​എം സംസ്ഥാന സെക്രട്ടറി കോടിയേരി ബാലകൃഷ്​ണൻ. പിണറായി വിജയനെതിരെ നടന്നത്​ വധശ്രമമായിരുന്നെന്നും മുഖ്യമന്ത്രി വിമാനത്തിൽനിന്ന്​ പുറത്തിറങ്ങും മുമ്പ്​​ കോൺഗ്രസ്​ അക്രമികൾ മുഖ്യമന്ത്രിയെ ലാക്കാക്കി പാഞ്ഞടുത്തെന്നും പാർട്ടി മുഖപത്രത്തിലെഴുതിയ ലേഖനത്തിൽ കോടിയേരി പറഞ്ഞു.

പ്രതിഷേധിക്കാനായി മൂന്നുപേർ വിമാനത്തിൽ കയറുന്ന കാര്യം മുഖ്യമന്ത്രി നേരത്തേ അറിഞ്ഞിരുന്നെന്നും സുരക്ഷ ഉദ്യോഗസ്ഥർ ഇക്കാര്യം മുഖ്യമന്ത്രിയെ അറിയിച്ചിരുന്നെന്നും മുഖ്യമന്ത്രി വിമാനത്തിൽനിന്നിറങ്ങിയ ശേഷമാണ്​ യൂത്ത്​ കോൺഗ്രസ്​ പ്രവർത്തകർ മുദ്രാവാക്യം വിളിച്ചതെന്നുമാണ്​ നേരത്തേ കോടിയേരി ഒരു പൊതുയോഗത്തിൽ പ്രസംഗിച്ചിരുന്നത്​. ഈ നിലപാട്​ തിരുത്തുന്നതാണ്​ പാർട്ടി മുഖപത്രത്തിലെ ലേഖനം.

ഉയർന്ന നിരക്കിൽ ടിക്കറ്റെടുത്ത്​ വിമാനത്തിൽ കയറിയവർ കൃത്യമായ ആസൂത്രണം നടത്തിയാണ്​ കുറ്റകൃത്യത്തിനെത്തിയതെന്ന്​ ലേഖനത്തിൽ പറയുന്നു​. സീറ്റ്​ ബെൽറ്റ്​ മാറ്റാൻ അനൗൺസ്​​മെന്‍റ്​ ഉണ്ടാകുന്നതിനുമുമ്പ്​ ഇവർ ബെൽറ്റഴിച്ച്​ ​മുഖ്യമന്ത്രിയുടെ അടുത്തെത്തുകയായിരുന്നു. ഇ.പി. ജയരാജ‍ന്‍റെയും മറ്റും സന്ദർഭോചിതമായ ഇടപെടൽ കൊണ്ടാണ്​ അക്രമികൾക്ക്​ മുഖ്യമന്ത്രിയെ തൊടാൻ കഴിയാതെ പോയത്​. വിമാനറാഞ്ചികളുടെ ശൈലിയിലേക്ക്​ കേരളത്തിലെ കോൺഗ്രസ്​ എത്തുകയാണ്​. ഇതുവരെ പ്രധാനമന്ത്രിക്കെതിരെയോ രാഷ്ട്രപതിക്കെതിരെയോ മുഖ്യമന്ത്രിമാർക്കെതിരെയോ ഇങ്ങനെയൊരു അക്രമം നടന്നിട്ടില്ല. എന്നിട്ടും ഇതിനെ അപലപിക്കുന്നതിനു​ പകരം കോൺഗ്രസ്​ ന്യായീകരിക്കുന്നു. ഇടത്​ സർക്കാറിനെ അസ്ഥിരപ്പെടുത്താൻ യു.ഡി.എഫ്​-എൻ.ഡി.എ മുന്നണികൾ സയാമീസ്​ ഇരട്ടകളെപ്പോലെ പ്രവർത്തിക്കുന്നു. ദേശവ്യാപകമായി കോൺഗ്രസ്​ നടത്തിയ ഇ.ഡി വിരുദ്ധ സമരം കേരളത്തിൽ നാമമാത്രമായിരുന്നെന്നും കോടിയേരി കുറ്റപ്പെടുത്തി.