നിയമസഭയിലെ സംഘർഷം: നാല്​ പ്രതിപക്ഷ എം.എൽ.എമാർക്ക്​ താക്കീത്​

തിരുവനന്തപുരം: കഴിഞ്ഞദിവസം നിയമസഭയിലുണ്ടായ പ്രതിഷേധത്തിനിടെ സ്​പീക്കറുടെ ഡയസില്‍ കയറാൻ ശ്രമിച്ച നാല്​ പ്രതിപക്ഷ എം.എൽ.എമാർക്ക്​ താക്കീത്​. മാത്യു കുഴല്‍നാടന്‍, അന്‍വര്‍ സാദത്ത്, ഐ.സി. ബാലകൃഷ്ണന്‍, സജീവ് ജോസഫ് എന്നിവരെയാണ്​ സഭ താക്കീത്​ ചെയ്തത്​. പാർലമെന്‍ററികാര്യ മന്ത്രി എം.ബി. രാജേഷ്​ അവതരിപ്പിച്ച പ്രമേയം പ്രതിപക്ഷത്തിന്‍റെ എതിർപ്പോടെ സഭ പാസാക്കി.

സഭയിൽ പ്രതിഷേധം അരങ്ങേറുന്നത്​ ഇതാദ്യമല്ലെന്ന് പ്രതിപക്ഷ നേതാവ് വി.ഡി. സതീശന്‍ പറഞ്ഞു. അതിന്‍റെ പേരിൽ പ്രതിപക്ഷ എം.എൽ.എമാരെ ശിക്ഷിക്കുന്നത്​ അംഗീകരിക്കില്ല. പ്രതിപക്ഷത്തിന്‍റെ അവകാശം നിഷേധിക്കപ്പെട്ടപ്പോഴാണ്​ നടുത്തളത്തിൽ ഇറങ്ങിയത്​. പ്രതിപക്ഷം നടുത്തളത്തിലിറങ്ങിയാൽ സഭ നിർത്തി​വെച്ച്​ ചർച്ചചെയ്ത്​ പ്രശ്നപരിഹാരം ഉണ്ടാക്കുന്നതാണ്​ കീഴ്വഴക്കം. ‌സ്പീക്കര്‍ നിഷ്പക്ഷനല്ലെങ്കില്‍ ഇനിയും മുദ്രാവാക്യം വിളിക്കേണ്ടിവരുമെന്നും സതീശൻ പറഞ്ഞു.

സഭയില്‍ പ്രതിപക്ഷം അന്തസ്സ്​ പാലിക്കണമെന്ന് മുഖ്യമന്ത്രി പിണറായി വിജയന്‍ പറഞ്ഞു. പ്രതിപക്ഷത്തിന്​ ചില വിഷയങ്ങൾ രാഷ്ട്രീയമായി സഭയിൽ ഉന്നയിക്കേണ്ടിവരുമെന്നത്​ എല്ലാവർക്കും അറിയാം. അതിൽനിന്ന്​ മാറി വിഷയങ്ങളെ പ്രതിപക്ഷം വികാരപരമായാണ് സമീപിക്കുന്നത്. പരിധിവിട്ട് പെരുമാറുകയും ചെയ്യുന്നു. സ്പീക്കറെ അധിക്ഷേപിക്കുന്ന നടപടി അംഗീകരിക്കാനാകില്ല. അടിയന്തര പ്രമേയ ചര്‍ച്ച ഒഴിവാക്കാനായിരുന്നു പ്രതിഷേധമെന്നും മുഖ്യമന്ത്രി ആരോപിച്ചു.

അടിയന്തര പ്രമേയത്തിന്​ നോട്ടീസ്​ നൽകിയ ആളെ അത്​ അവതരിപ്പിക്കാൻ വിളിക്കുക കൂടി ചെയ്യാതെ സ്പീക്കർ സഭ നിർത്തിവെച്ചെന്നും ഒളിച്ചോടിയത്​ പ്രതിപക്ഷമല്ലെന്നും വി.ഡി. സതീശൻ മറുപടി നൽകി. സഭ മുഴുവൻ ബഹളത്തിൽ തുടരുന്ന സാഹചര്യത്തിൽ എങ്ങനെയാണ്​ അടിയന്തര പ്രമേയ അവതാരകനെ വിളിക്കാൻ സാധിക്കുകയെന്ന്​ മുഖ്യമന്ത്രി ചോദിച്ചു.