ക്ഷേമ പദ്ധതികളിലെ അനുപാതം: ഹൈകോടതി വിധി തെറ്റായ നടപടിയെന്ന് പാലോളി മുഹമ്മദ്​ കുട്ടി

കോഴിക്കോട്​: ന്യൂനപക്ഷ ക്ഷേമ പദ്ധതികളിലെ 80:20 അനുപാതം റദ്ദാക്കിയ ഹൈകോടതി വിധി തെറ്റായ നടപടിയെന്ന്​​ മുൻ ന്യൂനപക്ഷക്ഷേമ മന്ത്രിയും സി.പി.എം നേതാവുമായ പാലോളി മുഹമ്മദ്​ കുട്ടി. സച്ചാര്‍ കമ്മിറ്റി റിപ്പോര്‍ട്ടി​‍െൻറ അടിസ്ഥാനത്തില്‍ മുസ്​ലിം ന്യൂനപക്ഷത്തിന് വേണ്ടി മാത്രമാണ് എൽ.ഡി.എഫ് സര്‍ക്കാ‍ര്‍ ക്ഷേമ പദ്ധതികള്‍ ആരംഭിച്ചത്.

2015ല്‍ യു.ഡി.എഫ് സർക്കാർ ഈ പദ്ധതികളില്‍ 20 ശതമാനം മുസ്​ലിം ഇതര വിഭാഗങ്ങള്‍ക്ക് നല്‍കാന്‍ തീരുമാനിച്ചതാണ് വിവാദങ്ങള്‍ക്ക് ഇടയാക്കിയത്. ആ തീരുമാനമാണ് ഇപ്പോള്‍ കോടതി റദ്ദാക്കിയത്​. ഇത്​ എല്ലാ ജനവിഭാഗങ്ങൾക്കുമുള്ള ആനുകൂല്യമല്ലെന്ന്​ സർക്കാർ കോടതിയെ ബോധ്യപ്പെടുത്തണമെന്നും അദ്ദേഹം പറഞ്ഞു.

ക്രിസ്ത്യന്‍ അവശവിഭാഗങ്ങള്‍ക്ക് ആനുകൂല്യങ്ങള്‍ നല്‍കേണ്ടത് അനിവാര്യമാണ്. ഈ വിഭാഗങ്ങള്‍ക്കായി സര്‍ക്കാര്‍ പ്രത്യേക പദ്ധതികള്‍ ആവിഷ്കരിക്കണം. തുടര്‍ന്നു വരുന്ന അനുപാതം നിലനിര്‍ത്തിയാല്‍ വീണ്ടും ആക്ഷേപം ഉയർന്നേക്കുമെന്നും പദ്ധതികൾ നടപ്പാക്കാൻ സർക്കാർ മറ്റു വഴികൾ ആലോചിക്കണമെന്നും അദ്ദേഹം പറഞ്ഞു.