ദലിത്​, പിന്നാക്ക വിഭാഗങ്ങളുടെ രാഷ്​ട്രീയ ​െഎക്യം അനിവാര്യം –പ്രഫ. സതീഷ്​ ദേശ്​പാണ്ഡെ

കോഴിക്കോട്​: രാജ്യത്ത്​ ജാതി, വർഗീയ പ്രശ്​നങ്ങൾ വ്യാപിക്കുന്ന സാഹചര്യത്തിൽ ദലിത്​, പിന്നാക്ക വിഭാഗങ്ങളുടെ ​െഎക്യവും രാഷ്​ട്രീയ  മുന്നേറ്റവുമാണ്​ ആവശ്യമെന്ന്​ ഡൽഹി സർവകലാശാലയിലെ ഡൽഹി സ്​കൂൾ ഒാഫ്​ ഇക്കണോമിക്​സ്​ സോഷ്യോളജി പ്രഫ. സതീഷ്​ ദേശ്​പാണ്ഡെ പറഞ്ഞു. തുഞ്ചത്തെഴുത്തച്ഛൻ മലയാള  സർവകലാശാല കോഴിക്കോട്​ സംഘടിപ്പിച്ച ശ്രീനാരായണ ഗുരുവി​​​െൻറ ‘നമുക്ക്​ ജാതിയില്ല’ വിളംബര ശതാബ്​ദി പ്രഭാഷണം നിർവഹിക്കുകയായിരുന്നു അദ്ദേഹം.

ഗുജറാത്തിലും മഹാരാഷ്​ട്രയിലും രൂപപ്പെട്ട ദലിത്​, മുസ്​ലിം ​െഎക്യം ഒരു ചുവടുവെപ്പാണ്​. എന്നാൽ,  മുസ്​ലിംകളെ രണ്ടാംതരം പൗരന്മാരായി കാണണമെന്ന വ്യവസ്​ഥയോടെ ദലിതരെ ഹിന്ദുത്വരാഷ്​ട്രീയത്തിലേക്ക്​ ക്ഷണിക്കുന്ന സാഹചര്യമാണ്​  വർഗീയ രാഷ്​ട്രീയ സാഹചര്യത്തിൽ പ്രകടമാകുന്നത്​. ജാതിവ്യവസ്​ഥക്കെതിരെ 20ാം നൂറ്റാണ്ടി​​​െൻറ ആദ്യവാരം​ രാജ്യത്ത്​ ഉയർന്ന പ്രതികരണത്തി​​​െൻറ  സാഹചര്യം തന്നെയാണ്​ ഇപ്പോഴും നിലനിൽക്കുന്നത്​. ജാതി ഇപ്പോഴും നമ്മുടെ ജീവിതത്തി​​​െൻറ അവിഭാജ്യ ഘടകമായി  നിലനിൽക്കുന്നു. ജാതീയത ഉറപ്പിച്ചുനിർത്തിയാണ്​ ദേശീയത വളരുന്നതെന്നും അദ്ദേഹം കൂട്ടിച്ചേർത്തു.

പിന്നാക്കവിഭാഗങ്ങളുടെ സാമ്പത്തിക അഭിവൃദ്ധിയിലൂടെ ജാതി ഇല്ലാതാക്കാമെന്ന നെഹ്​റു മുതൽ ഇ.എം.എസ്​ വരെയുള്ളവ​രുടെ കാഴ്​ചപ്പാടുകൾ ഒരുവശത്തുള്ളപ്പോഴും സമൂഹത്തിൽ സാമ്പത്തിക അന്തരം പ്രകടമാണ്​. ഇന്ത്യയിൽ ഇപ്പോഴും ജാതിയധിഷ്​ഠിത സാമ്പത്തികവ്യവസ്​ഥയാണ്​ നിലനിൽക്കുന്നത്​. സമ്പത്തി​​​െൻറ കാര്യത്തിലും തൊഴിലില്ലായ്​മയുടെ കാര്യത്തിലും പിന്നാക്ക വിഭാഗങ്ങൾ പിറകിൽതന്നെ.  

വിവാഹംപോലും ജാതിമുക്​തമാക്കാൻ സാധിച്ചിട്ടില്ല. മിശ്രവിവാഹത്തിൽ ജനിക്കുന്ന കുട്ടികളും ജാതിയിൽ നിന്ന്​ രക്ഷപ്പെടുന്നില്ല​.  ഉന്നതവിദ്യാഭ്യാസ മേഖലയിലും ജാതീയതയുടെ അതിപ്രസരമാണ്​. രോഹിത്​ വെമുല സംഭവം വിളിച്ചുപറയുന്നതും മറ്റൊന്നല്ല. ഇത്തരമൊരു  സാഹചര്യത്തിൽ ശ്രീനാരായണ ഗുരുവി​​​െൻറ ചിന്തകൾക്കും പ്രവർത്തനങ്ങൾക്കും പ്രസക്​തി ഏറെയാണെന്ന്​ അദ്ദേഹം വ്യക്​തമാക്കി.

മലയാള സർവകലാശാല വൈസ്​ ചാൻസലർ കെ. ജയകുമാർ അധ്യക്ഷത വഹിച്ചു. കെ.എസ്​. ഹക്കീം സതീഷ്​ ദേശ്​പാണ്ഡെയെ  പരിചയപ്പെടുത്തി. പ്രഫ. ജോണി സി. ജോസഫ്​ സ്വാഗതവും ഡോ. സ്വപ്​നറാണി നന്ദിയും പറഞ്ഞു.