സ്വകാര്യ സർവകലാശാല; വിയോജനക്കുറിപ്പിൽ ‘മാധ്യമം’ വാർത്തകളും

തിരുവനന്തപുരം: സംസ്ഥാനത്ത്​ സ്വകാര്യ സർവകലാശാലകൾക്ക്​ അനുമതി നൽകുന്നതിനുള്ള ബില്ലിന് നിയമസഭ സബ്​ജക്ട്​ കമ്മിറ്റിയിൽ ​ പ്രതിപക്ഷ അംഗങ്ങൾ നൽകിയ വിയോജനക്കുറിപ്പിൽ ചൂണ്ടിക്കാട്ടിയത്​ ‘മാധ്യമം’ വാർത്തയിലൂടെ പുറത്തുകൊണ്ടുവന്ന വിവരങ്ങൾ. വിദ്യാഭ്യാസം സംബന്ധിച്ച സബ്​ജക്ട്​ കമ്മിറ്റിയിലെ പ്രതിപക്ഷ അംഗങ്ങളായ ആബിദ്​ ഹുസൈൻ തങ്ങൾ, ടി.വി. ഇബ്രാഹിം, രാഹുൽ മാങ്കൂട്ടത്തിൽ എന്നിവർ നൽകിയ വിയോജനക്കുറിപ്പിലാണ്​ സ്വകാര്യ സർവകലാശാല ബില്ലിലെ ന്യൂനതകൾ ചൂണ്ടിക്കാട്ടി ‘മാധ്യമം’ പ്രസിദ്ധീകരിച്ച വാർത്തകളിലെ വിവരങ്ങൾ ഉൾപ്പെടുത്തിയത്​.

സ്വകാര്യ സർവകലാശാലകളിലെ ഫീസിളവിന്‍റെ പരിധിയിൽ പിന്നാക്ക, ന്യൂനപക്ഷ വിഭാഗങ്ങളിൽപെട്ട വിദ്യാർഥികളെയും സാമ്പത്തികമായി പിന്നാക്കം നിൽക്കുന്നവരെയും ഉൾപ്പെടുത്താത്തത്​ ‘മാധ്യമം’ വാർത്തയിൽ ചൂണ്ടിക്കാട്ടിയിരുന്നു. പ്രതിപക്ഷ അംഗങ്ങൾ ബില്ലിൽ വിയോജിപ്പ്​ രേഖ​പ്പെടുത്തി സമർപ്പിച്ച കുറിപ്പിൽ ഇത്​ ചൂണ്ടിക്കാട്ടിയിട്ടുണ്ട്​. സ്വകാര്യ സർവകലാശാല വരുന്നതോടെ അതിലേക്ക്​ കൂട്ടിച്ചേർക്കുന്ന സ്​പോൺസറിങ്​ ബോഡിയുടെ കീഴിലുള്ള മെഡിക്കൽ, എൻജിനീയറിങ്​ കോളജുകളിലെ ഫീസ്​ നിർണയാധികാരം സർക്കാറിന്​ നഷ്ടപ്പെടുമെന്നും വിയോജനക്കുറിപ്പിൽ പറയുന്നു.

ഇതുവഴി ഫീസ്​ വർധനക്കും ദരിദ്ര വിദ്യാർഥികളുടെ പഠനാവസരം നിഷേധിക്കുന്ന സാഹചര്യവുമുണ്ടാകും. എസ്​.ഇ.ബി.സി വിഭാഗങ്ങൾക്ക്​ വിവിധതരം കോഴ്​സുകളിൽ വ്യത്യസ്ത അനുപാതം സംവരണമാണ്​ നിലവിലുള്ളത്​. വ്യത്യസ്തതരം കോഴ്​സുകൾ പഠിപ്പിക്കുന്ന (മൾട്ടി ഡിസിപ്ലിനറി) സ്വകാര്യ സർവകലാശാലയിൽ ഏത്​ രീതിയിലുള്ള സംവരണം പാലിക്കുമെന്നും വിയോജനക്കുറിപ്പിലുണ്ട്​. സംവരണം കഴിഞ്ഞാൽ ശേഷിക്കുന്ന 60 ശതമാനം സീറ്റിലേക്ക്​ സംസ്ഥാനത്തിന്​ പുറത്തുള്ളവർക്കും പ്രവേശനം നൽകാമെന്നും അതുവഴി പ്രഫഷനൽ കോഴ്​സുകളിൽ കേരളത്തിലെ വിദ്യാർഥികൾക്ക്​ സീറ്റ്​ നഷ്ടമുണ്ടാകുമെന്നും പ്രതിപക്ഷ അംഗങ്ങൾ ചൂണ്ടിക്കാട്ടുന്നു.

പ്രവേശന മാനദണ്ഡങ്ങൾ വ്യക്​തമായി ഉൾപ്പെടുത്തിയില്ലെങ്കിൽ ഭാവിയിൽ ഇത്​ നിയമപോരാട്ടത്തിലേക്ക്​ വഴിതുറക്കുമെന്നും സംവരണ വിഭാഗങ്ങളുടെ ആനുകൂല്യങ്ങൾ നിഷേധിക്കുന്നതിന്​ കാരണമാകുമെന്നും വിയോജനക്കുറിപ്പിൽ പറയുന്നു. എന്നാൽ ഉപരിപഠനത്തിനായി സംസ്​ഥാനത്തെ വിദ്യാർഥികൾ വിദേശ സർവകലാശാലകളെ ആശ്രയിക്കുന്ന സാഹചര്യത്തിൽ സ്വകാര്യ സർവകലാശാലകൾക്ക്​ അനുമതി നൽകാനുള്ള സർക്കാറിന്‍റെ നയംമാറ്റത്തെ സ്വാഗതം ചെയ്യുന്നതായും പ്രതിപക്ഷ അംഗങ്ങൾ വിയോജനക്കുറിപ്പിൽ പറയുന്നു.