ആർ.ടി.പി.സി.ആർ പരിശോധനാ നിരക്ക്​ കുറച്ചതിനെതിരെ സ്വകാര്യ ലാബുകൾ ഹൈകോടതിയിൽ

കൊച്ചി: കോവിഡ്​ -19 ആർ.ടി.പി.സി.ആർ പരിശോധനാ നിരക്ക്​ 500 രൂപയായി കുറച്ചതിനെതിരെ സ്വകാര്യ ലാബുകൾ ഹൈകോടതിയിൽ. സർക്കാർ ഉത്തരവ്​ റദ്ദാക്കണമെന്നാണ്​ ലാബുകളുടെ ആവശ്യം.

അല്ലാത്തപക്ഷം സബ്​സഡി നൽകണം. സർക്കാർ ഉത്തരവ്​ ഐ.സി.എം.ആർ നിർദേശങ്ങൾക്ക്​ വിരുദ്ധമാണെന്നും ഹരജിയിൽ ചൂണ്ടിക്കാട്ടി. കേസ്​ കോടതി ചൊവ്വാഴ്ച പരിഗണിക്കും.

നേരത്തെ 1700 രൂപയായിരുന്നു ലാബുകൾ ഈടാക്കിയിരുന്നത്​. ഈ നിരക്ക്​ രാജ്യത്തെ തന്നെ ഏറ്റവും ഉയർന്നതാണെന്ന പരാതി വ്യാപകമായിരുന്നു. സർക്കാർ ആശുപത്രികളിൽ കോവിഡ് പരിശോധന സൗജന്യമാണെങ്കിലും സ്വകാര്യ ആശുപത്രികളിലും ലാബുകളിലും വൻ വില ഈടാക്കുന്നത് വിവാദമായ സാഹചര്യത്തിലാണ്​ നിരക്ക്​ കുറച്ചത്​.

ഐ.സി.എം.ആര്‍ അംഗീകരിച്ച ടെസ്റ്റ് കിറ്റുകള്‍ കുറഞ്ഞ നിരക്കില്‍ വിപണിയില്‍ ലഭ്യമായ സാഹചര്യം പരിഗണിച്ചാണ്​ പരിശോധന നിരക്ക് കുറച്ചതെന്ന്​ മന്ത്രി കെ.കെ. ശൈലജ പറഞ്ഞിരുന്നു. ടെസ്റ്റ് കിറ്റ്, വ്യക്തിഗത സുരക്ഷാ ഉപകരണങ്ങൾ, സ്വാബ് ചാര്‍ജ് തുടങ്ങിയവ ഉള്‍പ്പെടെയാണ് ഈ നിരക്ക്.

എന്നാൽ, 500 രൂ​പ​യാ​ക്കി​യ സ​ർ​ക്കാ​ർ തീ​രു​മാ​നം ഒരുവിഭാഗം ലാബുകൾ തുടക്കം മുതലേ അംഗീകരിച്ചിരുന്നില്ല. ആ​ർ.​ടി.​പി.​സി.​ആ​ർ ന​ട​ത്താ​നാ​വി​ല്ലെ​ന്ന്​ കാണിച്ച്​ പ​ല​യി​ട​ത്തും പ​രി​ശോ​ധ​ന നി​ർ​ത്തി​വെ​ച്ചു. ഇതിനെതിരെ മുഖ്യമന്ത്രിയടക്കം രൂക്ഷമായി പ്രതികരിച്ചിരുന്നു.