ക്ഷേത്ര ചുറ്റമ്പലത്തിനുള്ളിൽ കീഴ്ശാന്തി ജീവനൊടുക്കി

കൊല്ലം: ക്ഷേത്ര ചുറ്റമ്പലത്തിനുള്ളിൽ കീഴ്ശാന്തിയായ യുവാവിനെ തൂങ്ങിമരിച്ച നിലയിൽ കണ്ടെത്തി. പാലക്കാട് ഗോവിന ്ദപുരം അട്ടയാവതി ഹരിശ്രീയിൽ ഗിരി ഗോപാലകൃഷ്ണൻ-സുധാദേവി ദമ്പതികളുടെ മകൻ അഭിമന്യുവാണ്​ (19) മരിച്ചത്. പനയം ക്ഷേത്രത്തിൽ രാവിലെ പ്രഭാതപൂജകൾക്കായി ക്ഷേത്രം തുറക്കാനെത്തിയവരാണ് അഭിമന്യുവിനെ മരിച്ചനിലയിൽ കണ്ടെത്തിയത്.

പ്രണയിനിക്ക് രാത്രി വാട്സ്ആപ്പിലൂടെ വിഡിയോ കോൾ നടത്തിയായിരുന്നു ആത്മഹത്യ ചെയ്തതെന്ന് അഭിമന്യുവി​​​​െൻറ ഫോൺ പരിശോധനയിൽ വ്യക്തമായതായി പൊലീസ് പറയുന്നു. അഞ്ചാലുംമൂട് പൊലീസ്, വിരലടയാള വിദഗ്ധർ എന്നിവരെത്തി തെളിവെടുപ്പ് നടത്തിയ ശേഷം മൃതദേഹം ജില്ല ആശുപത്രി മോർച്ചറിയിലേക്ക് മാറ്റി.

ക്ഷേത്രത്തിൽ കോടി അർച്ചന യജ്ഞം നടന്നുവരുകയാണ്. നേരത്തേ ഈ ക്ഷേത്രത്തിൽ കീഴ്ശാന്തിയായിരുന്ന അഭിമന്യു കോടിഅർച്ചന ചടങ്ങുകൾക്കായി അടുത്തിടെയാണ് വീണ്ടും ക്ഷേത്രത്തിലെത്തിയത്. ഇതേ ക്ഷേത്രത്തിലെ മേൽശാന്തിയായിരുന്ന ഹരിനാരായണൻ സഹോദരനാണ്. മൃതദേഹം പോസ്​റ്റ്​മോർട്ടത്തിന് ശേഷം ബന്ധുക്കൾക്ക് വിട്ടുനൽകി. മന്ത്രി ജെ. മേഴ്സിക്കുട്ടിയമ്മ, അസി. കമീഷണർ എ. പ്രദീപ്കുമാർ എന്നിവർ സ്ഥലത്തെത്തിയിരുന്നു.