മെൽബണിൽ മലയാളി വൈദികന്​ കുത്തേറ്റ സംഭവത്തിൽ പ്രതി പിടിയിൽ

മെൽബൺ: ആസ്ട്രേലിയയിൽ ക്രിസ്ത്യൻ പള്ളിയിലെ കുർബാനക്കിടെ മലയാളി വൈദികന് കുത്തേറ്റ സംഭവത്തിൽ പ്രതി പിടിയിൽ. ​ഫോക്​നോർ സ്വദേശിയായ 72കാരനാണ്​ പിടിയിലായത്​. പ്രതിക്ക്​ മാനസികാസ്വാസ്​ഥ്യമുണ്ടെന്ന സംശയത്തെ തുടർന്ന്​ വൈദ്യപരിശോധനക്ക്​ വിധേയമാക്കി. അതേ സമയം, പരിക്കേറ്റ വൈദികൻ ടോമി മാത്യുവി​​െൻറ കഴുത്തിലെ പരിക്ക്​ സാരമുള്ളതല്ല.

കഴിഞ്ഞദിവസം ആസ്ട്രേലിയൻ സമയം രാവിലെ 11ന് നോർത്ത് ഫോക്നർ, 95 വില്യം സ്ട്രീറ്റിലെ സെന്‍റ് മാത്യൂസ് പള്ളിയിൽ ഞായറാഴ്ച കുർബാന നടത്തുന്നതിനിടെയാണ് സംഭവമുണ്ടായത്​. കത്തിയുമായെത്തിയ അജ്ഞാതൻ 'ഇന്ത്യക്കാരനായ നീ ഹിന്ദുവോ മുസ് ലിമോ ആയിരിക്കും, അതിനാൽ പ്രാർഥന നടത്താൻ പാടില്ല, നിന്നെ ഞാൻ കൊല്ലും' എന്ന് പറഞ്ഞാണ് ആക്രമണം നടത്തിയത്.