കെട്ടിടത്തിന്‍റെ വലിപ്പമനുസരിച്ച്​ സ്ലാബും വെള്ളക്കരവും നിശ്ചയിക്കുന്നതിന്​ നടപടി ആരംഭിച്ചു

തിരുവനന്തപുരം: കെട്ടിടത്തിന്‍റെ വലിപ്പത്തിനനുസരിച്ച്​ സ്ലാബും വെള്ളക്കരവും നിശ്ചയിക്കുന്നതിന്​ നടപടിയാരംഭിച്ച്​ ജല​ അതോറിറ്റി. ഇതുസംബന്ധിച്ച്​ അതോറിറ്റി തയാറാക്കിയ താരിഫ്​ സർക്കാറിന്‍റെ പരിഗണനക്കയച്ചു. നിലവിൽ ഉപഭോഗം അടിസ്ഥാനമാക്കി മാത്രമാണ് നിരക്ക് നിശ്ചയിച്ചിരുന്നത്​. പുതിയ താരിഫ്​ സർക്കാർ അംഗീകരിച്ചാൽ ചെറിയ കെട്ടിടങ്ങൾക്ക്​​ കുറഞ്ഞ നിരക്കും വലിയ കെട്ടിടങ്ങൾക്ക്​ ഉയർന്ന നിരക്കുമാകും.

ഗാർഹിക-ഗാർഹികേതര ഉപഭോക്തക്കൾക്കെല്ലാം ഇത് ബാധകവുമായിരിക്കും. സാമൂഹികപ്രതിബദ്ധതയുടെ പേരിൽ നേരത്തെ തന്നെ പരിഗണന വിഭാഗത്തിൽ ഉൾപ്പെടുത്തിയിട്ടുള്ള ബി.പി.എൽ, ഗുരുതരമായ അസുഖങ്ങൾ ബാധിച്ചവർ എന്നിവർക്ക്​ ഇളവുകളോടെയുള്ള താരിഫും അതോറിറ്റി നിർദേശിച്ചിട്ടുണ്ട്​. ഒപ്പം അംഗൻവാടികൾ, ഭിന്നശേഷിക്കാർക്കുള്ള സ്ഥാപനങ്ങൾ, പുനരധിവാസ കേന്ദ്രങ്ങൾ, വായനശാലകൾ, ആരാധനാലയങ്ങൾ എന്നിവയെ പുതുതായി പരിഗണന വിഭാഗത്തിൽ ഉൾപ്പെടുത്തിയിട്ടുണ്ട്​.

നിലവിൽ ഗാർഹികം, ഗാർഹികേതരം, വ്യവസായം, സ്‌പെഷൽ (നിർമാണാവശ്യം) എന്നിങ്ങനെ നാല് വിഭാഗങ്ങളാണുള്ളത്​. ഇതിനുപുറമെ വ്യവസായ പാർക്കുകൾ, ടൗൺഷിപ്പുകൾ എന്നിവ ഉൾപ്പെടുന്ന ‘വൻകിട ഉപഭോക്താക്കൾ’ എന്ന ഒരു പൊതുവിഭാഗം കൂടി ചേർത്തിട്ടുമുണ്ട്. വലിയ​ തോതിൽ വെള്ളം ആവശ്യമുള്ള അമ്യൂസ്‌മെന്റ് പാർക്കുകൾ, വാഹന സർവിസ് സെന്റർ, നീന്തൽക്കുളങ്ങൾ, കുപ്പിവെള്ള ഫാക്ടറികൾ, എന്നിവക്ക്​ ഉയർന്ന നിരക്കിലുള്ള സ്ലാബാണ് ​ശിപാർശ ചെയ്​തിട്ടുള്ളത്​.